Gleðilegt sumar!

Það er svo skrýtið að halda upp á sumardaginn fyrsta í þessu landi okkar, sem aldrei er almennilega búið að ákveða hvernig veðrið verður þennan daginn, vikuna, mánuðinn, misserið eða árið. En gleðilegt sumar og vonandi verður það veðurblítt líka.

Konur, ritskoðun og lífskjör í Íran

Yfirleitt fyllist ég (oft ástæðulausri) tortryggni þegar ég sé að erlendir dagskrárgerðarmenn eru að gera þætti um ástandið í framandi heimshlutum (myndi þó ekki hika við að slást í hóp þeirra ef ég væri í þessum bransa, en það er önnur saga). En ég datt inn í þátt sem mér fannst býsna góður á ríkissjónvarpinu í kvöld. Sem sagt þátt sem enskur dagskrárgerðarmaður gerði um Íran, þar sem hann tók sér fyrir hendur að skrifa grein fyrir tímarit sem höfðar til ungs fólks í Íran, efnisval hans og leiðina til að fá greinina birta, sem minnst fyrirframritskoðaða. Honum tókst að gera þáttinn þannig úr garði að örlög fólksins sem hann fjallaði um urðu síður en svo léttvæg og hann kynnti okkur fyrir fólki af holdi og blóði (og sál) sem manni var síður en svo sama um. Smá brot af starfi fyrrverandi fíkla til að halda sér frá efnunum, brot úr sögu nokkurra kvenna og Einar Bárða þeirra Írana eru minnisstæðir karakterar. Framákona með mannaforráð komst að skemmtilegri niðurstöðu um hvers vegna hún vildi frekar konur í vinnu hjá sér, frekar en karla. Sjáum til, ef hún réð konu þá reddaði hún sé sjálf kaffi, ljósritaði og faxaði fyrir sjálfa sig, en karl í sömu stöðu þyrfti ritara, þernu og símadömu. Ójá, hún sagði það. Svo sá maður að photoshop er notað í fleira en að gera fyrirsætur sléttar og grannar, bannað hár og bert hold (handleggi) má einnig fela. 

Veturinn kveður með óþarfa hvelli

Þessi vetur er að kveðja okkur Íslendinga með óþarfa hvelli, eldur og vatn hafa sagt til sín og spurning hvort jörðin og himininn eiga eftir að blanda sér í málið. Indjánarnir í New Mexico (og eflaust víðar) vitna reyndar frekar til fjóreykisins jarðar, vinds, elds og vatns, sem sagt loftið er vindurinn, sem er svo sem næsti bær við. Við höfum reyndar nóg haft af vindi (foki) og jörð (skriðum) að undanförnu, sbr. Sauðarkrók um daginn og fleiri atburði að undanförnu. Ég held upp á árstíðaskiptin með því að leggjast í pestina sem ég ætlaði ekki að láta hafa af mér þennan seinasta vetrardag, og svo vona ég bara að þessi hálf veikindalegi vetur sé að baki og allt það vesen sem honum hefur fylgt, eftir smá tíma mun ég hvort sem er bara muna þetta skemmtilega sem gerðist í vetur, sumarfríið á Kanarí og Ameríkuferðina, frábær jól og áramót, skautaferð, VG uppsveifluna miklu en þó ekki síst bara þægilegar og notalegar stundir heima með fjölskyldunni. Þetta hefur verið köflóttur vetur en eins og alltaf er minnið þegar farið að grisja þetta leiðinlegra frá og magna upp það besta. Vonandi verður það saman raunin í Reykjavík og á Króknum, Laugarvegurinn hreinn og fínn eftir þvottinn og endurbyggingin norðan og sunnan heiða til fyrirmyndar.

Blessað kjördæmið mitt - VG rokkar enn

Þá eru að koma nýjar skoðanakannanir og enn staðfestist sókn Vinstri grænna, tveir þingmenn inni hjá okkur hér. Ekkert smá glæsilegir fulltrúar sem við eigum, Ögmundur og Guðfríður Lilja, hún verður að haldast inni, ég skora á ykkur! Og það eru konurnar sem stýra þessum breytingum.

Óviðráðanleg þörf fyrir að hrósa borgarstjóra

Heyrði í sjónvarpi áðan frá borgarstjóra (vonandi rétt eftir haft) að hann leggi áherslu á að halda þeirri heildstæðu götumynd sem var á horni Austurstrætis og Lækjargötu þar sem enn brennur. Skil hann svo að hann muni vilja láta endurbyggja húsin í sinni upprunalegu mynd, frá því um 1800. Ég skora á hann að standa við þessi orð með fullri sæmd. Það er hægt að endurbyggja með miklum sóma, t.d. er fallegt dæmi um það í gamla bænum í Varsjá og reyndar miklu víðar.

Sjónvarpsseríur sem enda ekki (Prison Break)

Hef ánetjast tveimur sjónvarpsþáttaröðum, 24 og Prison Break undanfarna vetur (báðar mjög spennandi og önnur alla vega (24) með mjög vafasömu innihaldi en óbærilegri spennu - sem er nóg fyrir mig). Missti af lokaþætti nýjustu seríu Prison Break og þegar ég kom heim áttu eftirfarandi samræður sér stað:

- Hvernig var lokaþáttur Prison Break?

- Þetta var ábyggilega ekki lokaþáttur, hann endaði engan veginn.

- Lokaþátturinn í fyrra var svoleiðis líka, ég ætlaði aldrei að láta hafa mig að fífli aftur.

- Ég veit eiginlega ekki hvernig hann endaði.

Svo fór ég  á netið og fletti upp lokaþættinum og fékk tvær mismunandi útgáfur: Annars vegar að framburður hálfsköllótta, dökkhærða gæjans hefði sýknað Lincoln og Söru og hins vegar að Sara væri komin í verulegan vanda, jafnvel úti um hana. Svo ég hélt áfram að spyrja fjölskylduna:

- Kom fram framburður sem sýknar Lincoln og Söru?

- Hann fær ábyggilega hjartaáfall.

- Bíddu, fékk einhver hjartaáfall?

- Nei, hann fær ábyggilega hjartaáfall í næstu seríu.

- Kom framburðurinn fram eða ekki?

- Hann er búinn að segja þetta en það er ekki komin niðurstaða.

- Hann er ekki búinn að bera vitni (þegar hér er komið sögu ætti að vera ljóst að ekkert okkar man hvað þessi hálfsköllótti, dökkhærði sem reyndi að drekkja Söru í baðkarinu en er núna orðinn góður, heitir).

HJÁLP! 

 

 

 

Vetur án kvefs?

Nú er hafið æðisgengið kapphlaup við veturinn, ég er staðráðin í að láta kvef ekki leggja mig að velli núna í vetur, og núna þegar ég er farin að snýta mér og reyna að láta linsurnar fljóta rétt í uppfullum augunum þarf ég bara að harka af mér í rúman sólarhring í viðbót til að lifa heilan vetur án kvefs! Verðugt verkefni, ekki satt? Yfirleitt hef ég líka verið hraust, ekkert átakanlega kvefsækin miðað við þau ár sem börnin voru á leikskóla og í skóla þar sem þau pikkuðu upp allar pestir. Reyndar smá viðvörun í vetur varðandi heilsuna, en það er allt komið í farveg, þannig að ég get aftur farið að láta kvef fara í taugarnar á mér. Mikil forréttindi meðan það er ekkert alvarlegra. Atsjú!

Æsispennandi framhaldssaga um vottun á launajafnrétti - 2. kafli

Búin að finna meira um það sem ég heyrði í hádegisfréttum. Fann þetta á síðu 4 í mogganum í dag (pappírsútgáfunni). Sem sagt, fjölmörg fyrirtæki hafa lýst yfir áhuga á tillögum samráðshóps félagsmálaráðherra um vottun á jafnlaunastefnu og fjögur vilja fá svona vottun þegar í stað - bæði opinber og einkafyrirtæki! Þetta verður gæðastimpillinn þeirra. Glæsilegt. Mér finnast þetta vera stórfréttir! Félagsmálaráðherra var að kynna málið í gær ásamt fólki frá Háskólunum í Reykjavík og á Bifröst. 

Þá þarf bara að ráðast að launaleyndinni, sjá kafla 3. í þessari æsispennandi framhaldssögu. Ég vona að hann verði birtur sem allra fyrst. VG eru líklegastir til að gera eitthvað í því máli og ég held að stór hluti Samfylkingarinnar eigi samleið með okkur hvað það varðar, vona alla vega að hægri armurinn hjá þeim sé ekki of stór, nei é g hef tröllatrú á þetta gæti gerst á næstu árum komist réttir flokkar til valda. 

 

Uppsveiflan á Suðurlandi og ástæður skiptingar

Nú eru kjördæmin að tínast inn í sundurliðuðum könnunum. Ítarleg könnun í Suðurlandskjördæmi sýndi hvar fylgisaukningin lá, og hún var að vanda mest hjá Vinstri grænum. Mér fannst sérstaklega vænt um að heyra skýringu einstaklings á Höfn í Hornafirði sem var spurður hvers vegna Vinstri græn hefðu svona mikið fylgi í austaverður Suðulandskjördæmi sem raun ber vitni. Ætli það sé ekki af því við höfum svo fallega náttúru hérna og kunnum svo vel að meta hana, eitthvað á þá leiðina var svarið. Næstum feimnislegt, en bara svo falleg skýring og ég er alveg til í að kaupa hana. 

Vottun um launajafnrétti hjá fyrirtækjum?

Rétt náði í skottið á frétt um vottun á launajafnrétti hjá fyrirtækjum og finnst þetta bara sniðug hugmynd, hafi ég skilið hana rétt. Hlakka til að heyra meira, sé ennþá ekkert um þetta á vefnum.