(Stutt) bloggfrí

Eins og sjálfætt starfandi kona þarf stundum að gera þarf ég að eyða mestöllum tíma mínum í verkefni milli þess sem ég get deilt tíma mínum með áhugamálunum. Nú er ég stödd á svona vinnutarnartímabili og þarf að sinna vinnunni og fjölskyldulífinu meira en áhugamálunum í bili (bloggi og öðru). Loka kommentakerfinu á meðan ég gef mér ekki tíma til þess að sinna því. Kosningabaráttan fer svo væntanlega á fullt um eða eftir páskana og væntanlega verð ég farin að blogga aftur fyrir þann tíma. 

Obama hjá Jay Leno líka

Ótrúlegt hvað við erum óvön því að bandarískur forseti hegði sér (opinberlega) öðru vísi en fyrirrennararnir. Sennilega þarf að fara aftur til forsetatíðar Kennedys til að sjá eins miklar breytingar á ,,stíl" forseta og þegar hafa orðið á stuttum valdatíma Obama. Hann mætir til Jay Leno (sýnt á Skjá einum í kvöld) og er ferlega fyndinn en kemur samt að alvarlegum málum með sannfærandi hætti. Hann talar við geimfara í geimstöð í sömu viku, ekki eins óvænt, en samanlagt er augljóst að nýr stíll fylgir honum. Klárlega skiptir stíllinn engu máli samanborið við það sem hann er að gera, en það sem engu að síður er að koma í ljós er að hann gerir sér grein fyrir þeim breytingum sem eru að verða í samfélaginu og velur hluta af þeim (Facebook og spjallþætti) til að ná til fólks, og það virðist virka.

Mér líkar húmorinn hans og hef hann grunaðan um að bera ábyrgð á honum sjálfur (spurður um hvers vegna hundurinn sé ekki kominn í Hvíta húsið: Þetta er Washington - þetta var kosningalorð!).

Obama hringdi út í geim

Loksins smá tími fyrir myndlist

Verið frekar geggjað að gera að undanförnu en í dag gat ég ekki staðist mátið og leyfði mér að taka frá 3-4 tíma í dag fyrir myndlistina, hliðarsjálfið mitt. Leyfi bara myndunum að tala, ég hef verið svolítið upptekin af áhrifum hellamálverka (sem ég hef verið svo lánsöm að skoða í Frakklandi, meðan enn var opin í einhverja hella). Engin endurgerð á slíku heldur bara pælingar út frá þeim tilkomumiklu myndum.

 

 

 

 

 

 

Ég líka ...

Ef VG heldur áfram að stýra efnahagsmálum þá sé ég vonarneista í þessu hrikalega ástandi. Á landsfundi Vinstri grænna voru miklar umræður um atvinnu- og efnahagsmál, urmull af góðum tillögum og mikið af umræðum um leiðir út úr vandanum. Enginn segir að þetta sé auðvelt, enginn er með yfirboð eða bull. Þetta er verkefni, erfitt verkefni, en ef við viljum að það sé unnið af mikilli elju, ábyrgð og með fullt af hugmyndum, upplýsingum og heiðarleika í farteskinu þá er leið út úr vandanum með því að endurnýja umboð VG. Og það sem skiptir mestu máli, sjónarmið jöfnuðar ráða meiri um sjónarmið gróða í fyrsta sinn í allt of langan tíma. Endurnýjum það umboð.

Obama sér vonarneista

Kjósendur eiga skilið að að fá heiðarlega valkosti

Fer ánægð af löngum og efnisríkum landsfundi VG. Mikill fjöldi efnismikilla ályktana var samþykktur í dag og greinilegt að okkar fólk fer ekki ráðalaust í kosningabaráttuna, velferðarmál, lýðræðismál, atvinnumál, efnahagsmál, utanríkismál og ýmislegt fleira var meðal þess sem ályktað var um og á síðu Vinstri grænna www.vg.is eru margar þessara ályktana þegar komnar inn.

Skýr krafa um heiðarleika, róttækni og málefnalega umræðu þar sem allt er uppi á borðinu er niðurstaða þessa fundar og kjósendur VG þurfa ekki að óttast að hreyfingin okkar fari undan í flæmingi. Samþykkt var tillaga sem gerir ekki bara núverandi stjórnarsamstarf að þeim valkosti sem flestir líta til heldur útilokar að kjósendur VG eigi á hættu að leiða Sjálfstæðisflokkinn til valda með fulltingi VG. Mér finnst býsna gott að tilheyra heiðarlegri hreyfingu.

VG bundin - á móti Sjálfstæðisflokknum

Landsfundur og landsviðburðir

Atburðir dagsins eru vissulega erfiðir og fyrir mér enn meiri staðfesting en nokkuð annað á því að það þarf að fá styrka, réttsýna og dugmikla stjórn að loknum kosningum. Þar vil ég sjá VG í forystu og vera á landsfundi hreyfingarinnar styrkir mig enn í þeirri trú að undir forystu VG sé farsælast að sigla út úr vandanum sem að steðjar, gæta að hagsmunum þeirra sem lökust hafa kjörin og byggja upp atvinnu og efnahag þjóðarinnar. Hugmyndir til atvinnuuppbyggingar hafa verið áberandi í máli fólks á landsfundinum og ég hlakka til að heyra niðurstöður málefnahópanna sem unnu sleitulaust í dag, en þær verða kynntar á morgun.

Vera á landsfundi VG: Að koma aftur inn í kjarna pólitískrar umræðu er ótrúlega gefandi

Hlaut mitt pólitíska uppeldi í Kvennalistanum, þótt ég hafi verið í alls konar friðar-, kvennabaráttu og annars konar réttlætisbaráttuhreyfingum á undan. Þar var grasrótarstarfið með því mesta sem gerst hefur í íslenskum stjórnmálum, þótt við höfum sjálfar oft viljað gera enn betur. Því var ég hálf hikandi að hella mér út í stjórnmál í ,,hefðbundnari" stjórnmálaflokki, það er vinstri grænum, þótt ég sé vissulega meðal stofnenda þeirrar ágætu hreyfingar og hafi starfað með henni að einstökum verkefnum. En mér líkar margt við að vera komin á bólakaf í starfið hjá vinstri grænum. Mér líkar auðvitað stefnan einstaklega vel, stefnan sem forðaði mér frá pólitísku munaðarleysi þegar ég neitaði að láta flytja mig hreppaflutningum úr Kvennalistanum yfir í Samfylkinguna á sínum tíma. Það var engin tilviljun að ég fann mig frá fyrstu tíð í þeirri stefnu.

Núna sit ég minn fyrsta landsfund VG og mér líkar málflutningur okkar fólks. Bæði fyrirfram tilkynntra ræðumanna og allra þeirra (alla vega 53) sem tóku þátt í almennum stjórnmálaumræðum í kvöld. Samhljómurinn er mikill, get tekið undir nánast með öllum nema þeim sem vilja slá af einarða andstöðu VG gegn ESB-aðild. Þeir voru teljandi á fingrum annarrar handar í umræðunni í kvöld svo ég kvíði því ekki hvernig landið liggur hjá okkur þegar tugir töluðu fyrir óbreyttri stefnu! Ég er rífandi stolt af flestu því sem okkar fólki hefur tekist að gera á stuttri setu í ríkisstjórn og þótt við eigum óunnin verk, þá mun verða gengið í þau! 

Sterk skilaboð frá yngra fólki

Hætt að níðast á þeim sem síst skyldi - eigum við ekki að framlengja samninginn við Ögmund í næstu kosningum?

Þetta er allt spurning um forgangsröðun. Þessi forgangsröðun er rétt, af hverju að seilast ofan í vasa þeirra sem síst ættu að verða fyrir barðinu á niðurskurðinum, þegar nóg er af fólki fyrirtækjum sem eru vel aflögufær - og jafnvel þegar sverfur að er hægt að skera burtu ákveðið bruðl og óþarfa eyðslu. Ég ætla sannarlega að vona að við höfum Ögmund í þessu hlutverki sem allra lengst og best.

Ögmundur afnemur dagdeildargjöld

Framboðslistar VG lagðir fram - stefnan í kosningabaráttunni mótuð um helgina

Þá eru framboðslistar VG í Reykjavík og Suðvestrinu komnir fram. Ég lenti á góðum stað á listanum í Reykjavík norðri - eins og ég reyndar vissi fyrir (reyndar ekki hvort það yrði í norðri eða suðri) en beið með að ræða þar til listinn væri fullgerður - og hlakka til að kjósa Suðvesturlistann sem er mjög skemmtilega skipaður, eins og fyrirsjáanlegt var. Allt getur gerst en horfur eru á að við fáum þrjú þingsæti í öllum kjördæmum nema einu, mér er sagt að núverandi niðurbrot kannana segi að það sé norðvesturkjördæm. Mismunur á stærð kjördæmanna og lítið úrtak í niðurbrotnum tölum getur hins vegar raskað þessu enn meira og kosninganóttin verður spennandi. Mér sýnist þó að ég sé líkleg í varaþingsæti, sem er mjög áhugaverð staða. Eins og ég hef ekki saknað þingsins sem vinnustaðar þessi 14 ár sem eru liðin síðan ég hætti þar, þá sé ég núna lag fyrir hugsjónirnar, lag sem ekki kemur alltaf.

Vinstri græn hafa skýra og góða stefnuskrá. Áherslurnar í kosningabaráttunni núna verða mótaðar á landsfundinum sem hefst núna klukkan þrjú í dag og stendur alla helgina.Þetta verður stutt og snörp barátta, ekki nema fimm vikur til kosninga. Til að tryggja réttlæti, jöfnuð og vönduð vinnubrögð í því gríðarlega átaki sem verður að koma samfélaginu aftur í starfhæft horf og tryggja hag þeirra sem verst eru settir er ekki hægt að sætta sig annað en stjórn með VG innanborðs eftir kosningar. Ábyrgð okkar sem mótum kosningaáherslur er því mikil en veganestið, stefna VG, gott.

Okkar fólk á mjög annríkt við að stjórna landinu og þoka frábærum málum áfram, loksins sjáum við að verið er að vinna heimavinnuna sína til þess að geta tekið á þessum hrikalegu efnahagsmálum. Því miður var komið nánast að auðu borði í mörgum þeim mikilvægu verkefnum sem nú er verið að vinna að, aðgerðaleysi fyrri stjórnar, sem ég var að vona að væri ekki eins svakalegt og virtist vera, var því miður ótrúlegt. Ég er líka sérlega ánægð með afstöðuna sem tekin er gegn mansali og vændi, þar sem áherslan er ekki á að níðast neitt frekar á stúlkunum og konunum sem hafa ,,lent" í þessu hlutskipti heldur beina sjónum sínum að því hvað liggur að baki mansali og þeirri flóknu umræðu sem flest í klám- og kynlífsvæðingu samfélagsins. Mikil kvenfyrirlitning og mannfyrirliting sem þar á sér stað, því við eigum ekki að gleyma því að strákar eru líka hluti fórnarlambanna sem selja sig, þótt fæstir þeirra séu gagngert fluttir til landsins í því skyni, nóg er af innlendum fíklum sem menn virðast reiðubúnir að notfæra sér.

Ætli fólk sé ekki fullfært um að hafa skoðun sjálft - og sé jafnvel hjartanlega sammála Jóhönnu?

Ætli fólk sé ekki fullfært um að hafa skoðun sjálft - og sé jafnvel hjartanlega sammála Jóhönnu? Ég ítreka enn það sem ég sagði í blogginu í gær, Obama er þegar búinn að taka í taumana í Bandaríkjunum í hliðstæðum málum. Hvort sem ríkinu eða verkafólki er sendur reikningurinn er álíka óafsakanlegt og í slíkum tilvikum er það vitlausasta sem hægt er að gera (og siðlausasta) að telja sig geta greitt þeim sem best hafa það stórar fúlgur í arð. Það fyrirtæki sem ekki getur greitt umsamdar smáhækkanir á lág laun hefur ekki efni á að greiða arð. Það fyrirtæki sem við og afkomendur okkar þurfum að greiða milljarðartugi með um ókomin ár hefur ekki efni á að greiða arð. Svo einfalt er það.

Atvinnurekendur reiðir Jóhönnu