Tímar hamfara - kunnátta í viðbúnaði

Það er alltaf hollt að bera virðingu fyrir náttúruöflunum og ég held að flestir Íslendingar finni fyrir slíkri virðingu þótt forvitnin og fífldirfskan beri stundum einstaka ofurliði. Hinar hamfarirnar, þessar sem birtast í skýrslunni miklu, eru kannski annars eðlis. Það sem eflaust kemur einhverjum í huga er nú hversu mikilvægt það væri fyrir þjóðina ef við gætum þjálfað upp almannavarnir og björgunarsveitir á efnahagssviðinu og til bjargar heimilinum sem væru jafn öflugar og farsælar og varnirnar og hjálparsveitirnar sem virðast alltaf til taks þegar náttúran lætur til sín taka.

 

Óskapáskar

Þó maður komi ekki öllu í verk sem til stendur, til dæmis ekki að skreppa upp í bústað, þá voru þessir páskar alveg innilega notalegir. Enduðu með trompi í dag þegar fullt af vinum og ættingjum komu í heimsókn, suma höfum við ekki séð allt of lengi. Litlu tvíburarnir hennar Guðrúnar frænku, Emil og Elín eru að spretta ótrúlega hratt og Katrín Ólöf bróðurdóttir mín orðin þvílík skvísa. Stína mágkona búin að fá afmælisgjöfina sína, það var líka gaman. Ari og Óli bökuðu vöfflur ofan í allan mannskapinn en hér vorum við 14 þegar flest var. Óskapáskar, sem sagt.

Óvart aprílgabb

Vaknaði fyrir hádegi á degi sem undir venjulegum kringumstæðum hefði verið ,,sofa út" dagur. Var farin að þræða alla betri stórmarkaði og verslanamiðstöðvar áður en ég var almennilega vöknuð. Erindið að leita að knallsvörtum tvíbanda léttlopa. Keypti upp byrgðirnar í Hagkaupum í Garðabæ um daginn og vonaði að þær dygðu. Var búin að leita þar aftur og ennfremur í Hagkaupum í Skeifunni án árangurs. Frétti að garndeildin í Fjarðakaupum væri nokkuð drjúg en hún gagnaðist mér lítið í þessum erindagjörðum. Eftir fýluferð í Smáralind (þar eru Hagkaup líka - best var nefnilega að fá garnið í einhverri Hagkaupsbúðanna því munur getur verið á sama lit eftir sendinum) var ég loks komin í Kringluna og fréttir hafnar í útvarpinu. En ekki búið að opna gjafavöruverslunina við hliðina á Eymundsson, þar sem oft má finna lopaliti sem ekki finnast annars staðar. En sem sagt, þar sem ég bjó mig undir að bíða nokkuð lengi eftir opnun þeirrar búðar sé ég til mannaferða í Hagkaupum og ráfa þangað að rælni. Og viti menn - þar var allt opið og það sem meira var, nóg af kolsvörtum tvíbandalopa og meira að segja á tilboðsverði. Þarna hljóp ég sem sagt apríl og allt endaði samt vel. Bið ekki um það betra. Lopapeysan sem Ari er í á myndinni er núna búin að eignast litla, svarta systur. 

Smá misskilningur: Það þarf ekki að smala köttum, þeir una sér vel í nærveru góðs fólks!

Smá skilaboð úr grasrót VG!

Ánægjulegar fréttir

Get ekki annað en glaðst yfir vali á framkvæmdastjóra Mannréttindaskrifstofunnar. Margrét er hörkukona sem hefur löngu sannað sig í störfum sínum. Hún hefur líka nauðsynlegan eldmóð. Kynni mín af henni og störfum hennar sannfæra mig um að þarna var vel valið.

Ráðin framkvæmdastjóri Mannréttindaskrifstofu

Jæja, þá vaknaði hann blessaður, mikið var ég oft búin að finna brennisteinslyktina

Eyjafjallajökull er víst öðru vísi núna:

Kæra ríkisstjórn: Skoðum það nú með opnum hug og án fordóma að standa sem lýðræðisleg og sjálfstæð þjóð fyrir utan Evrópusambandið! Það gerir þjóðin

Þjóðin sem reis upp og gerði búsáhaldabyltingu (sem endalaust verður deilt um hverju skilaði), hafnaði Icesave og verður kannski aldrei þæg aftur, hefur verið andvíg aðild að ESB að um langt skeið. Þótt einn flokkur í oddaaðstöðu hafi verið reiðubúinn að kúga hvaða samstarfsflokk sem var til þess að sækja um aðild að ESB og það komið í hlut míns annars mjög svo ágæta flokks að taka þátt í þeim gjörningi þá er ekki þar með sagt að ekki sé hægt að fara að hlusta á þjóðina og hreinlega að draga þessa umsókn til baka.

Þess vegna hvet ég ríkisstjórnina til þess að skoða það nú með opnum hug og án fordóma að standa sem lýðræðisleg og sjálfstæð þjóð fyrir utan Evrópusambandið! Draga umsóknina til baka og nota peningana sem sparast til þess að byggja upp öfluga samhjálp, samfélag og fjölbreytt atvinnulíf. 

 

Eyjafjallajökull

Mér hefur alltaf fundist Eyjafjallajökull ægifagur og jöklar með fallegustu fjöllum, enda fimm jökla sýn úr bústaðnum mínum (Eiríksjökull flottastur) og Snæfellsjökull þeim ágætum gæddur að blasa ótrúlega oft við mér: Þegar ég er á heimleið niður Garðaholtið, á leið upp í bústað, best nýtur hann sín ef bíllinn lafir á veginum undir Hafnarfjalli, út um þakgluggann á Tjörn, úr garðinum mínum, meira að segja á leiðinni í Háskólann grútsyfjuð á morgnana að renna niður Öskjuhlíðina, eða á hraðferð í Sandgerði að vinna þar. Alltaf blasir Snæfellsjökull við. Falleg sjón.

En samt er það Eyjafjallajökull sem mér þykir einna vænst um. Það á sér skýringar. Þau sex sumur á sjö ára tímabili, þegar ég var í sveit í Fljótshlíðinni, var hann alltaf jafn glæsilegur en það leyndi sér heldur aldrei að hann var ekki bara ís heldur líka eldstöð, því megna brennisteinslykt lagði oft yfir Hlíðina. 

Þegar ég fór síðla sumars á flokksráðsfund VG á Hvolsvelli gat ég ekki staðist það að finna mér gistingu í Fljótshlíðinni, sem ég og gerði. Allt Suðurlandið blasti Eyjafjallajökull við, báðar leiðir, en það var ekki fyrr en á bakaleiðinni að ég hafði rænu á og gaf mér tíma til að taka myndir af honum. Þá var ég reyndar komin alla leið að Landvegamótum. Eina af myndunum af jöklinum valdi ég síðan sem skjámynd á tölvunni minni í nýju vinnunni, LS Retail, þegar ég fór að vinna þar rétt fyrir jólin. Endurbirt hér að neðan. Þá var hann ekki farinn að láta á sér kræla eins og seinustu vikuna, en ég hef samt oft horft á skjáina tvo fyrir framan mig þegar ég er að skipta á milli forrita og skjala og hugsa með mér - af hverju datt mér í hug að setja einmitt þessa mynd á skjáinn minn? Svosem ekkert flókið svar, af því hún er svo falleg, af því jökullinn er svo fallegur. Ætli Gunnar hafi kannski horft eilítið austarlega þegar hann var eitthvað að nefna það að Hlíðin væri fögur?Jú, Hlíðin er nógu fögur ein og sér, en þessi jöklasýn!!!

Já, já, okkur Álftnesinga langar svoooooo mikið að sameinast ... bara einhverjum!

... og það var engin pressa á okkur þegar við vorum spurð!

 

 

Játning: Ég vona að þetta fari allt saman vel ...

Ég vona að við þurfum ekkert að borga af hinum svínslegum Icesave-skuldum

Ég vona að aðildarumsóknin að ESB-verði dregin til baka áður en hún skaðar okkur meira

Ég vona að kraftur færist í samfélagið, atvinnu, almannaþjónustu og framkvæmdir þegar Icesave-krumlan sleppir takinu

Ég vona að þeir sem eyðilögðu samfélagið okkar fái makleg málagjöld

Ég vona að eitthvað gott komi út úr þessu öllu saman ...

.................

Held ég hafi áður vitnað til kínverskrar bölbænar, hér á síðunni, sem ég heyrði fyrst á ensku og leyfi mér að vitna til eins og ég heyrði hana: ,,May you live in interesting times".

Það er ekki hægt að segja annað en við höfum lifað eftirminnilega tíma að undanförnu, en áhugaverða? Auðvitað á vissan hátt. En ég verð að viðurkenna að ég léti mér alveg duga áhugamál á borð við útsaum og skvass áfram! Þessi óleysta stærðfræðiþraut hér að neðan er mun áhugaverðari en sú þraut að tína saman peninga til að borga reikningana um hver mánaðarmót!