Þakka ykkur öllum fyrir þátttökuna í fegurðarsamkeppni íslenskra orða

Þakka ykkur öllum fyrir þátttökuna í fegurðarsamkeppni íslenskra orða. Hugsa sér, næstum 1600 atkvæði bárust! Umræðan sem hefur verið hér á síðunum að undanförnu um falleg íslensk orð hefur verið bæði gefandi og skemmtileg. Úrslitin eru rakin ítarlegar hér á undan, en orðið ljósmóðir sigraði, kærleikur var í öðru sæti og dalalæðan (sem ég hélt með) var í þriðja sæti. 

NEI tónleikarnir

Fallegt orð NEI, þegar það er í réttu samhengi. Minni bara á NEI-tónleika karlahóps feministafélagsins miðvikudaginn 1. ágúst kl. 20:00 á Grand Rokk. Meðal margra góðra atriða eru Lay Low, Pétur Ben, Ólöf Arnalds, Dikta og Sprengjuhöllin. 

Meiri upplýsingar hérna: http://karlarsegjanei.net/ 

Hér eru úrslitin í fegurðarsamkeppni íslenskra orða - sundurliðuð og meira til

Þá liggur niðurstaðan í fegurðarsamkeppni íslenskra orða loks fyrir. Hér er sundurliðunin sem ég þorði ekki að lofa fyrr en á morgun, segjum að það hafi morgnað snemma þennan daginn. Þorði ekki að treysta því að niðurstöðurnar afrituðust skikkanlega, en svo virðist vera. Og af því það telst varla áróður á kjörstað fyrst kjörstað hefur verið lokað þá upplýsist hér með að ég hélt með orðinu dalalæða og var auk þess veik fyrir gleym-mér-ei. En öll þessi orð eru bæði falleg og góð. 1572 voru búnir að taka þátt þegar ég tók skjáskotið (sem var öryggisventill ef skoðanakönnunin hefði óvart ,,dottið út" á lokasprettinum fyrir handvömm eða vegna tæknigalla). 

Ljósmóðir : 24% (387 atkvæði)
Kærleikur: 22% (356 atkvæði)
Dalalæða: 19% (307 atkvæði)
Andvari: 6% (109 atkvæði)
Djúp: 2% (38 atkvæði)
Friður: 2% (33 atkvæði)
Blær: 3% (61 atkvæði)
Eilífð: 2% (46 atkvæði)
Hrynjandi: 3% (59 atkvæði)
Undur: 0% (14 atkvæði)
Von: 3% (53 atkvæði)
Gleym-mér-ei: 6% (109 atkvæði)

 

Orðið ljósmóðir sigraði í fyrstu fegurðarsamkeppni íslenskra orða - glæsilegur lokasprettur

Orðið ljósmóðir sigraði í fyrstu fegurðarsamkeppni íslenskra orða hér á blogginu Orðið var lengst af í forystu en um tíma skákaði orðið kærleikur því og hnífjafnt var fyrir aðeins rúmum sólarhring, en á lokasprettinum stakk ljósmóðir öll hin orðin af. Í þriðja sæti kom svo orðið dalalæða, sem átti frækilegan lokasprett. Nánar verður sagt frá úrslitum á blogginu á morgun og sigurvegararnir kynntir og krýndir síðar. 

Innan við klukkustund þar til úrslit keppninnar um fegursta orð íslenskrar tungu liggja fyrir

Innan við klukkustund þar til úrslit keppninnar um fegursta orð íslenskrar tungu liggja fyrir. Sigurvegarinn verður kynntur á miðnætti í kvöld.

Ljósmóðir tekur forystu í fegurðarsamkeppni íslenskra orða á lokadegi kosningarinnar

Ljósmóðir tekur forystu í fegurðarsamkeppni íslenskra orða á lokadegi kosningarinnar. Kosningu lýkur á miðnætti í kvöld, mánudaginn 30. ágúst.

Núll komma eitt prósent - á sigurinn í fegurðarsamkeppni íslenskra orða að velta á prósentubroti?

Skreppitúr í sumarbústaðinn var aðeins lengri en ég hélt að hann yrði. Á meðan ég var í burtu átti ég von að annað hvort orðanna á toppnum myndi taka digga forystu, en ónei, það var nú eitthvað annað. Núll komma eitt prósent skilur á milli orðanna tveggja á toppnum, kærleiks og ljósmóður. Ætlar spennan eiginlega að verða óbærileg fram á seinustu stundu? Mér sýnist það eiginlega

Gunnuhelgi í sumarbústaðinum

Ég er svo heppin að eiga bestuvinkonu fyrir norðan, Gunnu á Guðlaugsstöðum. Við höfum verið að reyna að ná að hittast miðja vegu, hallar aðeins á mig, því Gunna verður að fara aðeins lengri veg ef við hittumst í sumarbústaðnum okkar í Borgarfirðinum. En samt, góð áætlun, sem skyndilega varð að veruleika þegar Gunna hringdi á föstudagskvöldin og þurfti að skreppa með stúlku sem vinnur á búinu hennar í Borgarnes. Ég var upptekin til klukkan tólf, en þá renndi ég í nesið og við hittumst í kaupfélaginu sem þessa stundina heitir Samkaup. Og aldeilis fullkominn laugardagur, sitja og spjalla fram á rauða kvöld við Gunnu. Svo sá ég seint í gærkvöldi að Gunna frænka í Borgarnesi hafði hringt. Hafði samband við hana í morgun og hún og Einar hennar komu í síðdegiskaffi upp í bústað og nú treysti ég því að þau fari að venja komur sínar uppeftir til mín og Gunna fyrir norðan geti líka komið sem oftast.

Kosningu um fegursta orð íslenskrar tungu lýkur á miðnætti næstkomandi mánudag

Kosningu um fegursta orð íslenskrar tungu lýkur á miðnætti næstkomandi mánudag. Kærleikur hefur tekið nauma forystu eftir að ljósmóðir hefur leitt, einnig naumlega, alla keppnina. Vonir dalalæðu fara þverrandi, þó hef ég frétt af því að rekin sé öflug kosningabarátta fyrir þetta ágæta orð í þriðja sætinu, en hvort það dugar til að breyta einhverju er álitamál, munurinn er orðinn það mikill. Önnur orð hafa minna fylgi og munurinn er mikill. Andvari er sem fyrr í fjórða sæti og gleym-mér-ei í því fimmta. Enn er hægt að taka þátt en stundunum fer fækkandi.

Kosningu fer að ljúka í fegurðarsamkeppni íslenskra orða. Kærleikur með nauma forystu á toppnum

Kosningu fer að ljúka í fegurðarsamkeppni íslenskra orða - aðeins rúmir þrír dagar eftir. Kærleikur er með nauma forystu á toppnum, ljósmóðir fylgir fast á eftir og dalalæða á litla möguleika.

Frá og miðnætti í dag, föstudag, gef ég þriggja daga frest til að ljúka kosningunni. Á miðnætti næstkomandi mánudag lýkur þessari kosningu í fegurðarsamkeppni íslenskra orða. Úrslit eru ennþá í járnum en einhvers staðar verður að setja punktinn og nú er komið að því, enda þátttaka loks að minnka.  

Nú er það nánast hnífjafn á toppnum - og góð röksemd fyrir orðinu Edda

Núna er nánast orðið hnífjafnt á toppnum í fegurðarsamkeppni íslenskra orða. 0.3 % atkvæða skilja á milli kærleika í fyrsta sæti og ljósmóður í öðru sæti (nema það breytist nema það breytist meðan ég pikka þetta inn). Svo fæ ég margar góðar ábendingar og reyni að koma orðunum á framfæri hér á síðunni eða í athugasemdum, enda mun ég taka saman öll tilnefnd orð og vinna á einhvern hátt úr því einstaka hráefni.

Í gærkvöldi spjallaði ég við töffaralegan mótorhjólakappa við þjóðveg 1 á Vesturlandi og hann lýsti ánægju sinni með öll þessi fallegu orð, hafði rekist á þau á vefnum. Og í athugasemdunum sé ég ýmislegt, meira að segja eitt sem ég ætla að draga hér fram á forsíðuna, stóðst ekki mátið, en lofa ekki að endurtaka það:

,,Þetta er góð hugmynd. En ég skal segja þér hvað fallegasta íslenska orðið er að mínu mati.

Fyrst eru hér rökfærslur:

Orðið er fallegt á blaði

Það er stutt og laggott og hljómar vel í munni

Það hefur fleiri en eina meiningu

Það er afar gamalt og hefur fylgt tungumálinu frá byrjun

Ef þetta væri alþjóðleg keppni myndi það sennilega blanda sér í toppbaráttuna.

Fallegasta orðið í íslenska tungumálinu er:

EDDA

Mér er full alvara með þessu og kalla eftir viðbrögðum. Ég myndi meta það mjög við þig ef þú gæfir þessu orði smá byr undir déin."