Notaleg nótt yfir sokkaprjóni og þrjár rómantískar gamanmyndir

Frjáls vinnutími hefur ýmsa kosti, þótt stöku morgnar detti inn í vinnutímann, svo sem morguninn í morgun, þegar ég var búin að bóka mjög fróðlegt viðtal tengt vinnunni minni. En þegar þannig stendur á getur verið gott að geta leyft sér að bæta úr smá bráðræði, svo sem þvotti á risasokki sem prýðir gifsklæddan fót eiginmannsins þessa dagana. Þvottur á þessum ullarsokki endaði með ósköpum og undarlega smáu og þykku eintaki, vel þæfðu. Þannig að upp voru teknir prjónar, rómantísk gamanmynd sett í tölvuna og byrjað að prjóna annan sokk í stað þess sem ég hafði prjónað daginn eftir að Ari minn braut sig. Það tekur næstum þrjár rómantískar gamanmyndir að prjóna einn hnéháan risasokk á fimm prjóna. Náði að klára áður en Ari vaknaði, árla að vanda, og var vel stolt yfir unnu verki og vel mett af rómantískum gamanmyndum í bili alla vega. Gaman að geta einstaka sinnum leyft sér svona lagað, gagn og gaman.

 

 

Athugasemdir

[Aprílrós, 10.1.2009 kl. 06:57]

Eiginmaður þinn er heppinn að eiga þig fyrir konu ;)

[Sædís Hafsteinsdóttir, 10.1.2009 kl. 12:07]

En hvað þú ert nú góð eiginkona

[, 10.1.2009 kl. 15:43]

Vel af sér vikið. Og Ari heppinn að eiga þig fyrir konu

[Anna Ólafsdóttir Björnsson, 10.1.2009 kl. 19:46]

Úpps, var ég að gefa svona fórnfúsa eiginkonumynd af mér. Hmmm, vildi að það væri rétt, en hér held ég bara allir hjálpist að.