Er eitthvað að fara að gerast í framtíðarlausnum?

Þessi litla frétt um brauristar á rafknúnum segulbrautum eru smá vísbending um að verið sé að finna lausnir sem eru ekki bundnar við þennan litla, venjulega, kassa sem þankagangur um lausnir í umferðarmálum er yfirleitt bundinn við. Hver veit nema einhvers staðar leynist lausn sem hentar lítilli borg með fullkominn flugvöll í 50 km fjarlægð sem gjarnan vill losa byggingarland undan innanlandsflugvelli án þess að rústa innanlandsflugið? Lausnin þarf að felast í ódýrum, öruggum og hraðskreiðum faratækjum sem taka lítið land undir umferðarmannvirki. Draumurinn væri auðvitað að hægt væri að leigja sér svona brauðrist fyrir sig, fjölskylduna og farangurinn og renna sér eftir ísi lögðum (öruggum) segulbrautum til Keflavíkur. Mér dettur ísinn í hug af því þar væri hægt að ná hraða og nýta sér hálkuna sem hvort sem er angrar alla vegi ótrúlegan stóran hluta ársins. Allar heiðarlegar framtíðarmyndir (nema þessar bölsýnu sem virðast vera í meirihluta) hafa boðið upp á miklu fullkomnari tækni en þá sem við nú búum við. Lýsi eftir fleiri hugmyndum því allt hefst jú á hugmyndum og það þarf ekki nema ein af þúsund að vera raunsæ til að hægt sé að komast áfram á þróunarbrautinni.

Á flugvöllinn í fjarstýrðu hylki

Athugasemdir

[Bragi Þór Valsson 19.12.2007 kl. 10:21]

Orkuveitustarfsfólkið gerði náttúrulega sitt til að "auglýsa" fararmáta framtíðarinnar með að láta manninn  mæta í vinnuna á rafmagnsbíl í nýja tónlistarmyndbandinu sínu: http://www.youtube.com/watch?v=X0zD59sre2A

[Anna Ólafsdóttir Björnsson, 19.12.2007 kl. 12:52]

Þetta er auðvitað snilldarmyndband, við mæðgurnar lágum í hlátri yfir því í gærkvöldi.

[Sigurður Hreiðar, 19.12.2007 kl. 15:21]

Kannski þetta sé lausnin, frú Anna:

http://www.flixxy.com/tiny-car-review.htm

[Anna Ólafsdóttir Björnsson, 19.12.2007 kl. 20:39]

Þetta er skemmtileg mynd, en ég er enn að hugsa um umferðaröryggið og ... nei, ekki alveg að virka á því sviði. Svo þarf eiginlega að setja í hann bakkgír ;-)