Vinnubrjálæðið
4.2.2007 | 21:22
Alltaf að heyra fleiri og fleiri vísbendingar um að Íslendingar og reyndar líklega heimurinn allur, sé að missa sig í vinnubrjálæði. Og þetta kvað fara versnandi, nýjustu tölur hér á landi sýndu nokkurn árangur í styttingu vinnuvikunnar fyrir nokkurm árum en nú er allt að fara aftur í sama, vonda farið. Blessunarlega er ég að vinna á vinnustað þar sem yfirlýst stefna er að vinna ekki nema umsamdan vinnutíma en ytri aðstæður gera það erfitt þessar vikurnar og ég finn að nú er ég komin á þann stað í lífinu að ég vil ekki lifa svoleiðis lífi til langframa. Vissulega er gaman að taka góðar tarnir, svona eins og eina kosningabaráttu eða svo eða klára cand. mag ritgerð í sumarbústað eða að skrifa bók í Borgarnesi, jafnvel aðra bók á Kanaríeyjum, svo maður skrifi út frá eigin reynslu. En eins og góðar tarnir eru ágætar eru frí og það að LIFA jafn mikilvægt og reyndar miklu mikilvægara. Núna er ég í fyrsta sinn í mörg ár að fara í frí hérna heima, áður en leiðin liggur til Kanarí, og nýt þess út í ystu æsar. Og samt er bara sunnudagur og ég byrjaði í fríinu eftir vinnu á föstdag ;-)
Þegar ég lifði og hrærðist í pólitík í sex ár fjallaði eitt af uppáhaldsmálunum sem ég flutti á alþingi um styttingu vinnutímans án kjaraskerðingar. Ég held það sé tími til kominn að dusta rykið af þessu máli og taka það upp og líklega þarf það að gerast á öðrum vettvangi en alþingi, því þar talaði ég hreinlega fyrir fullkomlega daufum eyrum, þótt einhverjir yrðu til að taka kurteislega undir, án mikillar sannfæringar.
Flokkur: Stjórnmál og samfélag | Breytt s.d. kl. 22:18 | Facebook
Athugasemdir
Já Anna mín þarna er ég sammála þér að dusta rikið af þessu máli og draga það aftur fram í umræðuna. Hins vegar er spurning hvort þú þurfir ekki að gerast verkalýðsforingi til þess að verða eitthvað ágengt.
Vilborg G. Hansen, 4.2.2007 kl. 21:38
Hmmm, hef aldrei prófað það, en satt að segja langar mig það ekki. Stéttarfélagið mitt, Blaðamannafélagið er reyndar ólíklegasta félag á landinu til að stuðla að styttingu vinnutímans.
Anna Ólafsdóttir Björnsson, 4.2.2007 kl. 22:05
Já ætli þú verðir ekki að horfa á nokkuð stærra félag til að koma svo stóru máli bara á dagsskrá. En Anna mín ég hef fulla trú á þér og veit að þér dettur eitthvað snjallt í hug til þess að ná þessu upp á borðið
Vilborg G. Hansen, 4.2.2007 kl. 23:47
Takk, Blaðamannafélagið er að vísu alveg frábært stéttarfélag, en ég verða að viðurkenna að ég sé það ekki sem réttan vettvang.
Anna Ólafsdóttir Björnsson, 5.2.2007 kl. 00:18