Ljósmóðir leiðir naumlega eftir fyrsta daginn í kosningu milli 12 fegurstu orða íslenskrar tungu

Ljósmóðir leiðir naumlega eftir fyrsta daginn í kosningu milli 12 fegurstu orða íslenskrar tungu. Fast á eftir koma orðin Dalalæða og Kærleikur. Mjög góð þátttaka var á fyrsta degi, þegar hafa 160 kosið og ég sé fram á að þær niðurstöður sem fást verði góðar. Öll orðin eru falleg, en vissulega á ég mín eftirlætisorð meðal þeirra og kannski upplýsi ég það eftir keppnina. En þangað til verðið það þið, þátttakendur í atkvæðagreiðslunni, sem ráðið ferðinni.

Annars var föstudagurinn 13. alveg yndislegur.  Ég var komin með snert af fordómum í garð föstudagsins 13. eftir að hafa upplifað nokkra leiðinlega 13. daga mánaðar, ekki alla á föstudegi, einn var að minnsta kosti á miðvikudegi, en í þetta sinn stýrði ég því svo að föstudaginn 13. myndi ég bara gera eitthvað skemmtilegt og það gekk eftir. Með mjög skemmtilegan fund í vinnunni í morgun, tengist framtíðarverkefnum, og eftir kl. 14 var ég komin í stutt en bráðskemmtilegt ferðalag um Suðurland með gömlum og góðum félögum. Hvar sem við komum var tekið yndislega á móti okkur og ég kom með sælubros á vör heim um hálf níu leytið. Náði meira að segja að skreppa í smá golf í annað skiptið í sumar, en þar er sannarlega mikið verk óunnið í að æfa sig til að verða skammlaus á vellinum. Mun ekki láta mitt eftir liggja. 

Svona er lokakeppnin - og þið ráðið hvaða orð verður á endanum valið fegursta orð íslenskrar tungu

Leikreglurnar í lokaáfanganum eru einfaldar. Í skoðanakannakerfi Moggabloggsins hér til vinstri eru tólf orð. Það er einfalt að kjósa, smella í reitinn við það orð sem þér finnst fallegast af þessum tólf. Meginreglan er sú að ekki sé hægt að kjósa oftar en einu sinni úr hverju heimilisfangi eða vinnustað (háð IP-tölum og ef til vill enn betri síun). Svona einfalt er þetta. Og ég vona bara að fegursta orðið sigri.

Tólf orð komust í úrslit um fegursta orð íslenskrar tungu - kjósið fallegasta orðið!

Nú er hafin lokahrinan í leitinni miklu að fegursta orði íslenskrar tungu. Hér á vinstri hönd er skoðanakönnunin sem verður vettvangur kosningarinnar þar til niðurstaða fæst. Orðin urðu á endanu tólf, sem hleypt var í úrslit, og er greint frá því hér að neðan hvernig það atvikaðist. Njótið vel og kjósið rétt ;-)

Svolítið merkilegt, núna er ég búin að vera að fylgja þessari fegurðarsamkeppni eftir um nokkurt skeið, minna fólk á ýmsa fresti sem voru að renna út, frestinn til að tilnefna orð, frestinn til að kjósa orð í aðalkeppnina, en allt í einu núna er þetta að baki og keppnin fer að lifa sínu eigin lífi hér á síðunum, ég mun vissulega minna á hana reglubundið og segja tíðindi, en núna er hún komin í farveg og mun lifa eins lengi og þarf til að fá skýr úrslit. Og ég ætla að leyfa mér að taka orð eins yndislegasta skálds Íslands, Jóns Helgasonar, mér í munn og segja:

Ég hverf inn til anna minna

Allt er líkt og var 

Kaldhæðni: Orðið gleym-mér-ei gleymdist á listanum en hefur samt fengið nokkur atkvæði - kemst með í lokakeppnina vegna þessa tæknigalla (og vinsælda orðsins)

Kaldhæði orðanna eða örlaganna. Orðið gleym-mér-ei var komið löglega í keppni og þar sem það hefur ekki fengið sömu auglýsingu og hin tilnefndu orðin, en samt nokkur atkvæði, þá hefur það verið dæmt með í lokakeppnina, vegna þessa tæknigalla og vinsælda þrátt fyrir hann. Þar með eru orðin sem virðast á leið í lokakeppnina orðin tólf. Og auðvitað var þetta orðið gleym-mér-ei sem varð fyrir barðinu á þessum örlögum

Miðnætti nálgast - þá hefst kosningin um fegursta orð íslenskrar tungu - ellefu orð eru á toppnum

Á miðnætti verður ljóst hvaða tíu (eða ellefu) orð hafa hlotið flestar tilnefningar af þessum 87 sem hafa verið nefnd til sögunnar í fegurðarsamkeppni íslenskra orða. Í augnablikinu eru 5 orð jöfn í 7-11 sætinu og með því að leyfa ellefta orðinu að taka þátt get ég látið kosningu hefjast á miðnætti eins og til stóð. En enn geta tölur breyst, svo allur fyrirvari er á þessari tilkynningu.

Ljósmóðir, dalalæða eða kærleikur fegurstu orð íslenskrar tungu? (Og poolmótið í gærkvöldi)

Enn eru atkvæði að dreifast of mikið til að gefa sterka vísbendingu á öll þau orð, 87 talsins, sem hafa fengið tilnefningu í keppninni um fegursta orð íslenskrar tungu. Samt hefur orðið Ljósmóðir haft forystu frá upphafi og orðið kærleikur fylgt fast á eftir. Núna er orðið dalalæða komið fast upp að hlið kærleikans. Út þennan sólarhring er hægt að lýsa stuðningi við einstök orð, og þau10 sem verða á toppnum þá fara í lokakeppnina. 

En að öðrum þáttum í lífinu. Ég vann í næstum fimm ár á vinnustað þar sem mikið var um að ég kæmist ,,út að leika með krökkunum" - sem var nokkuð nýtt fyrir mér. Hvorki Læknablaðið, Alþingi, Vikan né Garðaskóli voru þannig vinnustaðir, þótt góðir væru. Svo fór ég að vinna í hugbúnaðarbransanum, og allt í einu var ég farin að eyða stöku síðdegi og allmörgum kvöldum við að spila pool, borðtennis,  fara í keilu, laser tag en reyndar varð ég að segja pass þegar við fórum í paintball, því viku síðar ætluðum við Ari í silfurbrúðkaupsferð til Egyptalands og mér fannst ekki við hæfi að mæta á ströndina útötuð marblettum, sem mér skilst að séu fylgifiskar paintball.

Nú er ég búin að færa mig um set í hugbúnaðarbransanum og minna um leiki, en samt hafa verið haldin nokkur poolmót og ég er hreinlega í skýjunum yfir því sem haldið var í gærkvöldi, þar sem ég náði fjórða sætinu (!). Hæfileikar mínir á þessu sviði byggjast á nokkrum leikjum í febrúar hvert ár, þegar við Ari erum á Kanarí. Þetta er næstum eins og þegar Íslendingar ,,sigruðu" Frakka 1-1 í fótbolta um árið!

Fegursta orð íslenskrar tungu - forystuorðin - línur skýrast en allt opið enn

Línur eru ögn að skýrast í valinu á 10 fegurstu orðum íslenskrar tungu, en um þau verður kosið í framhaldi af þessu forvali. Enn er orðið ljósmóðir með góða forystu, en orðin dalalæða,  andvari, kærleikur og friður koma næst á eftir. Blær, djúp, hrynjandi, undur og von koma þar á eftir. Önnur orð koma þar á eftir, hafi ég skoðað listann rétt. Orðin í neðri sex sætunum hafa aðeins 6-7 tilnefningar að baki og hægt að segja að öll orð eigi enn möguleika á að komast á 10 orða listann, en ætla má að efstu fjögur orðin ættu að komast að, ef engin meiri háttar smölun hefst með öðrum orðum. Ný orð sem tilnefnd voru, mörg mjög skemmtileg, komast ekki inn á listann nú, svo jafnræðis sé gætt gagnvart öllum, því margir fleiri vildu eflaust tilnefna fleiri góð orð.

Núna er sólarhringur þar til úrslit um 10 efstu orðin liggja fyrir. Og hér er listinn uppfærður:  

Almætti

Andvari (11)

Ást (3)

Barn (2)

Baugalín (5)

Ber

Blikur (2)

Blær(6)

Boðberi (2)

Brigsl

Dalalæða (12)

Dásemd(2)

Dís (2)

Djúp (7)

Dögg (2)

Eilífð (6)

Eirð

Englasöngur

Firrð (3)

Fjaðrablik (2)

Fjalldrapi

Fjarski (3)

Fjóla (2)

Frelsi (2)

Friður (7)

Gjálífi

Gleði (2)

Gæska (4)

Himinblámi (4)

Hittiðfyrradagur (2)

Hjálpsemi

Hnúkaþeyr (3)

Hógværð

Hrynjandi (6)

Hunang (2)

Hvanndalafossar

Jæja

Kakkalakki

Kona (2)

Kærkominn

Kærleikur (13)

Líf (5)

Ljóð (2)

Ljósmóðir (18)

Ljósvaki (3)

Ljúflingur (2)

Mamma (5)

Miskunn 

Morgunroði

Móðir (3)

Nauðlending

Nenna

Nótt (4)

Orð (3)

Óðfluga (2)

Óstjórn

Röst 

Samhygð

Samkennd (3)

Samstarf

Skrautfjöður

Snjóþekja

Sonatorrek 

Sól

Sólargeisli

Sólskríkja (2)

Straumur

Streymi

Sumar (2)

Svif (4)

Sæll (3)

Taktur

Túnfífill

Unaður (3)

Undur (6)

Vinabönd

Vinátta (2)

Viska (3)

Von (6)

Vor

Yndi (3)

Þel (4)

Þingvellir

Þoka (3)

Þýða (2)

Æska (2)

Öndvegi (2)

 

 

Eftir rúmar 38 stundir verður ljóst hvaða orð taka þátt í lokakeppninni um fegursta orð íslenskrar tungu - enn er hægt að hafa áhrif

Brá mér upp í sumarbústað eftir vinnu í gær og því er ég ekki búin að uppfæra atkvæðafjöldann sem hvert orð hefur fengið í keppninni um fegursta orð íslenskrar tungu. Þakka öllum sem hafa tekið þátt nú þegar og minni á að á lokasprettinum þarf líka að líta við og kjósa rétta orðið, en þá stendur valið eingöngu um 10 vinsælustu orðin.

Hins vegar var enginn vafi á því hvert var fegusta útsýni íslenskrar náttúru í morgun, það var fimm jökla sýn úr Borgarfirði, þar sem sól og blíða brosti við okkur þegar við lögðum af stað til vinnu um sex leytið. Það var ekki fyrr en undir Hafnarfjalli sem við ókum undir skýjabakkann, sem lá eins og mara yfir höfuðborgarsvæðinu. Mér sýnist á spám að helgin verði góð. 

Himinlifandi yfir þátttökunni og handviss um að í þetta sinn finnum við fegursta orð íslenskrar tungu - leitin er hálfnuð

Nú er leitin að fegursta orði íslenskrar tungu rétt um hálfnuð. Tilnefningar nálgast hundraðið, þar af náðu 87 tímanlega inn í keppnina. Atkvæði dreifast mjög mikið ennþá, en samt eru línur rétt að byrja að skýrast. Listinn er í þriðja bloggi hér frá og ég held áfram að uppfæra hann þar enn um sinn, en afrita hann svo þegar á þarf að halda. Á fimmtudagskvöldið (miðnætti) ætti að liggja ljóst fyrir hvaða 10 orð hafa náð inn í úrslitakeppnina, sem verður haldin á skoðanakannanasvæðinu hér til hliðar. Ef nokkur orð verða jöfn í neðri sætunum (af þeim 10 efstu) verður eflaust að kjósa milli þeirra í sólarhring í viðbót.

Hver og einn má styðja 1-10 orð í milliriðlum í keppninni um fegursta orð íslenskrar tugu

Orð eru vandmeðfarin. Ég sé að ég hef skrifað frekar óljóst um það hvernig velja á þau 10 orð sem fara í lokakeppnina um fegursta orð íslenskrar tungu. Hver og einn má styðja 1-10 orð í lokakeppnina (hámark 10 til að ég nái að halda utan um öll atkvæðin). Listinn er í næsta bloggi á undan og endilega verið dugleg að styðja ,,ykkar" orð.