Passíusálmur númer 51 og stjórnarskráin

Við sátum hérna fyrr í kvöld, Ari minn og Gurrí vinkona og vorum að rifja upp Passíusálm númer 51 eftir Stein Steinarr. Mikið rosalega er það nú alltaf skemmtilegur kveðskapur. Fyrir ykkur sem ekki munið eftir þessu ljóði þá byrjar það á þessum frábæru línum (eftir minni):

Á Valhúsahæðinni er verið að krossfesta mann

og fólkið tekur sér far með strætisvagninum til að horfa á hann  ...

Það er svo gaman að rekast á skemmtilegan kveðskap. Svo komu systur mínar og tveir vinir til viðbótar og mikið verið að pæla og skoða, hlusta og spjalla, rétt í lokin sagði Elísabet systir að það væri búið að semja tónlist við stjórnarskrána. Mér fannst það auðvitað snilld og ætlaði varla að ná því hvernig það hefði getað farið framhjá mér, sem er eiginlega forfallinn aðdáandi nútímatónlistar, ekki síst íslensku tónskáldanna. Alin upp í tímum hjá Atla Heimi í Menntó og bý núna við þann lúxus að hafa hér mörg bestu tónskáld landsins hér í sveitinni minni (sem er víst orðin bær) hér á Álftanesi. Og auðvitað var þetta héðan af svæðinu, tónlist eftir Karólínu sem býr hérna í götunni (og hefur samið mikið af tónlist sem ég er hrifin af) og meðal flytjenda eru Ingibjörg Guðjónsdóttir, sem er alveg rosalega góð söngkona og svo Tinna dóttir Karólínu. Hmmmm, ég verð greinilega að fylgjast betur með og ná að hlusta á þetta verk. Sé ekki að verkið hafi verð flutt annars staðar en á Akureyri og í tengslum við listviðburð (sýningu) þar. Stutt síðan ég heyrði mjög flott verk eftir Karólínu við annan svolítið óvenjulegan texta: Njólu, heimspeki- og eiginlega heimslýsingarrit eftir Björn Gunnlaugsson (sem var kennari í Bessastaðaskóla) og þá var það einmitt Ingibjörg sem söng, mjög flott verk. 

 

Athugasemdir

[Jenný Anna Baldursdóttir, 22.3.2008 kl. 10:27]

Það hlýtur að vera upplifun að heyra lagið við stjórnarskrána.

Steinn Steinarr; minn uppáhalds.

Páskakveðjur

[Linda litla, 22.3.2008 kl. 11:33]

Hvernig er svo stjórnarskráar lagið ?

[Brattur, 22.3.2008 kl. 13:32]

... var einmitt að lesa klassískt ljóð eftir Stein... það komast fáir með tærnar þar sem hann hafði hælana... Halldór Laxness var reyndar frábært ljóðskáld... og jafnvel betri þar heldur en í skáldsögunum... hann hefur bara lítið verið í umræðunni þegar talað er um ljóðskáld...

[Anna Ólafsdóttir Björnsson, 22.3.2008 kl. 18:08]

Sammála um að Halldór hafi verið skemmtilegri sem ljóðskáld en skáldsagnahöfundur, hvort tveggja gott reyndar. En Steinn, hann er sér á parti. Núna er ég alveg ólm að heyra stjórnarskrárlagið, var ekki á Akureyri 15. mars þannig að nú er bara að fylgjast með og vona að þetta verði ekki eini flutningurinn. Ef þið viljið heyra hvernig tónskáld Karólína er þá bendi ég á þennan link: tonverk.kontra.org

[Steinunn Helga Sigurðardóttir, 23.3.2008 kl. 09:03]

hann er alveg frábær, ætla að kíkja á þetta ljóð í dag. ég man eftir því, en ekki öllu.

Blessi þig í Ljósi

steina