Fermingarminningar í Vikunni

Fékk skemmtilegar spurningar frá blaðamanni Vikunnar um daginn, eitthvað á þessa leið: Hvernig var fermingardagurinn, veislan, kjóllinn og eftirminnilegasta gjöfin? Gerðist eitthvað sérstakt á fermingardaginn? Nú, ég lagðist auðvitað í upprifjanir og í Vikunni sem nú er í sölu er afraksturinn og þessi eldgamla mynd af mér með Manfred Mann gleraugun, sem líka fóru á Kinks-tónleikana ári fyrr eða svo. Svo er auðvitað fullt af fínu efni í Vikunni eins og venjulega, mér er alltaf vel við þetta blað, þar sem ég vann í fimm indæl ár í hópi einstakra öðlinga út blaðamannastétt á árunum 1980-1985, Sigurðar Hreiðars (auto.blog.is), Jóns Ásgeirs Sigurðssonar, Borghildar Önnu Jónsdóttur, Ragnars Th. og ótrúlega margra annarra frábærra vina minna upp á lífstíð. Margir snillingar hafa komið við á Vikunni um lengri eða skemmri tíma og ég hef tekið eftir því að flestum finnst Vikan hafa verið langskemmtilegust á meðan þeir voru að vinna þar :-) en mér finnst hún reyndar oftast hafa verð góð og vera það núna.

Athugasemdir

[Jenný Anna Baldursdóttir, 17.3.2009 kl. 00:24]

Jésús Anna, þessi hárgreiðsla!

Ertu í KR-kjól?

Þeir hétu það þessir svart-hvítu.

[Anna Ólafsdóttir Björnsson, 17.3.2009 kl. 02:23]

Jamm, það er auðvitað hrikalegt að setja svonatvær hæðir og ris á hausinn á 13 ára barni. En þótt ég hafi nú búið hinu megin við götuna frá KR vellinum frá 5 ára til 12 þá er mér sauðburðurinn á Jófírðarstaðatúninu mun eftirminnilegri en KR leikirnir. Samt er ég KR-ingur þegar á reynir (sem er sjaldan). En mér hefur samt aldrei hugkvæmst að þetta væri KR-kjóll. Fyrir mér var þetta virðulegur op-art kjóll meðan fermingarsystur mínar fermdust allar í hvítum, gulum, bleikum, grænum og bláum kjólum og öllum nákvæmlega eins, blúnda og efni eða fóður í eins lit, ermalaust. Ekki fyrir mig. Fékk ekki bleika smekkinn fyrr en seinna.

[Anna Ólafsdóttir Björnsson, 17.3.2009 kl. 02:24]

Jófríðarstaðatúninu ...