Vil ekki sleppa hendinni af sumrinu - ekki enn - Óskar og Sjallarnir boða vetrarkomu

Sólin er að brjótast fram af og til hérna í Borgarfirðinum. Vindsængin sem hefur verið úti á palli lengst af sumri var undir þaki hér á pallinum í nótt svo og stólarnir á veröndinni. En í stað lóðréttu rigningarinnar sem hefur kætt gróðurinn af og til var hér slagveðursrigning hér í morgun meðan ég svaf svefni hinna réttlátu. Vindsæng og stólar eru í þurrkun. Sem betur fer er hlýindaspá framundan. Enn nokkrar fínstillingar eftir í málningavinnu heima á Álftanesi, en ég skóf einn glugga áður en ég fór í sveitina í gærmorgun. Þetta hefur verið svo gott sumar að ég óska mér alla vega sex vikna í viðbót af því og helst milds vetrar, óska eftir samherjum í að biðja um þetta góða veður áfram.

Nú er búið að staðfesta breytingar á stjórn borgarinnar, þannig að sveitaballahljómsveitin Óskar og Sjallarnir er að taka við. Svolítill garri í því og boðar ótímabæra vetrarkomu, þótt ekki sakni ég Ólafs nema að einu leyti, í húsaverndun. Dv.is segir Ólaf einan heima. Eina sem ég hefði sætt mig við væri endurkoma Tjarnakvartettsins, með Margréti innanborðs.

Athugasemdir

[Jenný Anna Baldursdóttir, 14.8.2008 kl. 14:30]

Ég er nærri því skælandi yfir nýjum meirihluta.

[Anna Ólafsdóttir Björnsson, 14.8.2008 kl. 14:48]

Ef Ólafur hefði viðurkennt tap sitt og hleypt Mragréti að þá værum við kannski að sjá Tjarnarkvartettinn spila og syngja. En nei, svo er ekki.

[Sigríður Jósefsdóttir, 14.8.2008 kl. 15:11]

Sæl Anna, og takk fyrir síðast (þrítugsafmæli Gurríar).  Ólafur vildi Tjarnarkvartett, sjá www.mbl.is.  Margrét er því miður eyland í pólitík, frjálslyndir vilja ekkert af henni vita, og óháðir ekki heldur.  Hitt er svo annað, sagt er að bláa höndin í Seðlabankanum beri alla ábyrgð á þessu.....