Þrumuveður í Rúmeníu ... eða þannig - eins og lítill jarðskjálfti á hlið

Stundum kemur hressilegt þrumuveður eftir sólríkan morgun og þannig varð það í dag. Hanna segir að þetta sé sennilega eitt voldugasta þrumuveðrið að undanförnu alla vega. Ég rétt slapp heim úr búðinni og af prent/ljósritunarstofunni, með mikilvægar glósur í lausagangi, lélega regnhlíf í fanginu og fjórar tveggja lítra vatnsflöskur á bakinu. Þrumurnar sem heyrast út um austurgluggann eru stundum í Rúmeníu, enda væri ekki nema korters keyrsla þangað ef vegurinn lægi beint í austur. Hraði þrumanna er öllu meiri. Eldingarnar voru vel sýnilegar i björtu og þegar veðrið var sem næst (sem sagt ekki handan landamæranna) og aðeins hægt að telja upp að fjórum milli eldingar og þrumu, þá nötraði fimmta hæðin hér í húsinu, þar sem við erum, allvígalega, þetta var eiginlega eins og lítill jarðskjálfti á hlið. Rúðurnar glömruðu afskaplega myndarlega, enda sæmilega stórar og gluggarnir ekki eftir íslenskum stöðlum, en tvöfaldir þó. Minn reyndar með fiskiflugu á milli sem stendur, af því þegar ég lokaði honum áðan, fyrir úrfellið, þá var hún stödd þar.

Og nú er sólin farin að skína á ný.

 

Athugasemdir

[Guðríður Hrefna Haraldsdóttir, 9.6.2008 kl. 19:46]

Mikið öfunda ég þig að fá þrumuveður, finnst það alltaf ógurlega spennandi. Fegin að barnaverndarnefnd komst ekki í málið þegar ég vakti son minn einu sinni af værum blundi (10 ára) til að upplifa eina þrumuveðrið sem ég man eftir í Reykjavík. Það var reyndar ekki skóli daginn eftir ... en sama!

Knúsaðu Hönnu frá mér og ég vona að þið hafið það frábært þrátt fyrir annir. 

[Anna Ólafsdóttir Björnsson, 9.6.2008 kl. 21:43]

Sammála, ég var að vísu orðin tvítug og liðlega það, þegar ég heimsótti foreldra mína sem bjuggu þá um stundarsakir í Frakklandi og það fyrsta sem mamma hlakkaði til að sýna mér voru mikilfengleg þrumuveður í fjöllunum í Auvergne. Það var stórkostleg sjón. Kvöldið sem ég kom hingað voru tignarlegar eldingar í kvöldhúminu, en því miður of fjarri (í áttina til Úrkaínu í það skiptið) til að þrumur fylgdu að nokkru gagni. Síðan hafa þrumuveður oftast komið síðdegis, áður en rökkvar, en samt flottar eldingar.

Og já, takk, við höfum það frábært!