Dagur að kvöldi

Dagur Eggertsson brilleraði í Kastljósi áðan, ég get ekki sagt annað. Sigmar gætti þess að vera jafn grimmur við hann og aðra, fyrir utan ákveðna mildi sem hann sýndi væntanlegum borgarstjóra í mjög pínlegum fréttaþætti (eflaust Kastljósi) í gærkvöldi. En skemmst er frá því að segja að Dagur kom þessari umræðu í kringum dæmalaus valdaskipti í borginni á hærra plan en hún hefur verið. Mig langar að sjá gott viðtal við Svandísi fljótlega, ég er mikill aðdáandi hennar eins og fleiri Íslendingar, ef til vill hef ég misst af einhverju, kemst ekki yfir að horfa á allt fréttatengt, en þangað til þá læt ég mér nægja frásögn Dags, sem var skýr og kippti umræðunni úr þessum fáránlega farsastíl sem hún hefur verið.

Athugasemdir

[Jón Helgi Gíslason 22.1.2008 kl. 21:39]

Mótmæli gegn þessum gjörningi í borginni. Slóðin er ;

http://www.petitiononline.com/mod_perl/signed.cgi?nogbodid&1

[Guðrún Jónína Magnúsdóttir 22.1.2008 kl. 22:52]

já, það er synd að vera ekki Reykvíkingur en ég er búin að senda mótmælaslóðina á alla Rvk-inga sem ég hef í e-mail.

Dagur stóð sig frábærlega og það sést best í þessum miklu þrengingum hvað er í drenginn spunnið. Við eigum eftir að sjá góða hluti til hans í framtíðinni. Hvað Svandísi áhrærir, hún er nú bæði jaxl og jarl upp á Húsvísku. Þau áherslunöfn hljóta aðeins þeir sem vekja aðdáun fyrir vasklega framgöngu.

[Anna Ólafsdóttir Björnsson, 22.1.2008 kl. 23:08]

Sammála því að það er vont mál núna að vera ekki Reykvíkingur. Ég fæ aðallega útrás á blogginu og svo í spjalli við fólk.

[Svala Jónsdóttir, 22.1.2008 kl. 23:26]

Dagur stóð sig mjög vel í þessu viðtali og hann stóð sig líka einstaklega vel á stuttum ferli sem borgarstjóri. Flestir Reykvíkingar sem ég hef heyrt í voru sáttir við Dag sem borgarstjóra, sama hvar í flokki þeir stóðu, enda var fyrri meirihluti með stuðning meirihluta borgarbúa en ég efast um að nýi meirihlutinn sé með meirihlutastuðnign.

[Anna Ólafsdóttir Björnsson, 23.1.2008 kl. 00:32]

Ég hef reyndar meiri trú á Sóleyju en svo að ég sjái hana fyrir mér valdalausa, þótt einhver formleg völd minnki um stund, en við erum greinilega öll sammála um Dag.

[Brjánn Guðjónsson, 23.1.2008 kl. 11:48]

Ég get tekið undir þetta og væri til í að sjá Svandísi svara Sigmari. Dagur hefur ekki versnað síðan ég sá hann flytja norska strumpalagið í gamla daga. Minn maður.

[Sigurður Viktor Úlfarsson, 23.1.2008 kl. 15:31]

Dagur hefur staðið sig ágætlega en það hefur svosem ekki mikið gerst á þessum tíma þannig að hann er eiginlega meira dæmdur af framkomu sinni en verkum enda gerist ekki margt á 100 dögum.

Svandís hins vegar er minni pappír.  Ég misst allt álit á henni þegar hún í hlutverki "orkuveitumálaráðherra" meirihlutans, þ.e. í hlutverki eigenda OR skipaði Hjörleifi forstjóra að skrifa undir sátt við hana sjálfa í stóra fundarboðsmálinu.  Það er verulega sóðalegt að sitja svoleiðis báðum megin við borðið.  Málið var algerlega tapað og OR hefði aldrei nokkurn tímann skrifað undir það nema vegna þess að Svandís krafðist þess í krafti eigendavalds.

Steininn tók síðan úr þegar hún setti inn í ofangreinda "sátt" að OR ætti að greiða 800 þús. kr. persónulegan reikning hennar vegna málskostnaðar í máli sem hún stofnaði til á einkaflippi en var síðan ekki tómtækt.

Mér finnst Svandís skörugleg og skemmtileg kona en sól hennar sem stjórnmálamanns hné til viðar í þessu máli.  Einnig á auðvitað eftir að komast einhver niðurstaða í málefni REI og OR þar sem enginn veit neitt eins og sakir standa.

[Anna Ólafsdóttir Björnsson, 23.1.2008 kl. 15:48]

Um sumt er fólk einfaldlega ósammála og það er líka hornsteinn lýðræðisins. Ég er ein þeirra fjölmörgu sem er sátt við Svandísi í REI málinu og harma það að hún skuli ekki fá tækifæri til að fylgja því til enda. En ég held að við munum fá mörg tækifæri til að dæma Svandísi af verkum hennar og held að sá dómur verði jákvæður.

[Anna Ólafsdóttir (anno) 23.1.2008 kl. 17:48]

Var ánægð með Sigmar og fannst Dagur standa sig vel í svörum. Hlustaði á Svandísi í viðtali í hásdegisfréttum og mér virðist ljóst að Ólafur hafi verið blekktur inn í þennan afleik. Ég get ekki ímyndað mér annað en hann tapi trausti borgarbúa við þennan gjörning.

[Anna Ólafsdóttir Björnsson, 23.1.2008 kl. 19:51]

Það verður spennandi að sjá hvort einhvern tíma kemst botn í atburðarásina, langar að lesa ævisögur eða sagnfræðiúttektir eftir 20 ár.