Herleg verslunarmannahelgi í Helsinki og skútusiglingar í sænska skerjagarðinum

Skrapp frá í viku ásamt Ara mínum og hef ekki einu sinni litið á netið á meðan, þótt með smá tilfæringum hefði það átt að vera hægt. Eyddi verslunarmannahelginni á ráðstefnu í Helsinki en ráðstefnuhaldararnir sáu til þess að við vorum einn og hálfan dag af þremur í skoðunarferðum. Frekar vel með okkur farið. Finnst líklegt að ég eigi eftir að segja eitthvað frá þessari ráðstefnu á næstunni hér á blogginu.

Svo var haldið til Sigga vinar okkar í Svíþjóð og Cillu konunnar hans. Þau búa í miðjum sænska skerjagarðinum svo nú erum við búin að sigla nánast linnulaust síðan á mánudaginn, fyrst með Stokkhólmsferjunni í 17 stundir frá Helsinki, þá beint um borð í strætóbát í þrjá og hálfan tíma. Á þriðjudag var það heljar löng skútusigling um skerjagarðinn sem gladdi geð, eina sem vantaði var meiri vindur, svo í búð með 60 ára gamla eikarbátnum hennar Cillu, í gær fórum með í styttri ferð (3-4 tíma) með eikarbátnum en í morgun var gamli vélbáturinn tekinn fram og keyrt á eyjuna þar sem bíllinn er geymdur, og þaðan keyrt upp á land og beint á Arlanda. Lentum fyrir rétt rúmum tveimur tímnum og þegar búin að fara í vinnuna með Ara að heilsa upp á soninn, skreppa í bað og spjalla við Nínu systur, sem er nýflutt heim frá Ameríku, kom hingað í gærmorgun, vonandi til varanlegrar dvalar.

Í kvöld er það heimboð hjá tengdamömmu því Freyr mágur minn sem býr í Barcelona er á landinu og fer á morgun. Fjölskylda á ferð og flugi. 

Athugasemdir

[HG 9.8.2007 kl. 21:46]

 Svakagaman að sjá að þú ert komin aftur og velkomin heim. Jú, jú, auðvitað langar mig í fréttir af ráðstefnunni og það veistu. Ekki er ég hissa á því að Finnarnir hafi notað tækifærið og kynnt ykkur fyrir gersemum Finnlands, þeir eru einhverjir mestu snillingar í vöruþróun og markaðssetningu sem ég veit til. 

[Steinunn Helga Sigurðardóttir, 10.8.2007 kl. 16:06]

velkomin heim ! ég var líkaí Svíþjóð í 9 daga, fallegt land ! mikil náttúra.

Ljós og friður til þín

 steina í Lejre

[Anna Ólafsdóttir Björnsson, 10.8.2007 kl. 20:17]

Á reyndar alveg einstaklega ljúfar minningar frá Svíþjóð, alltaf gaman að koma þangað.

[Guðríður Hrefna Haraldsdóttir, 10.8.2007 kl. 21:39]

Velkomin heim, elskan. Vona að ég sjái þig hressa á sunnudaginn! Hanna sagðist búast við að koma beint frá flugvellinum af skátamótinu!

[Anna Ólafsdóttir Björnsson, 10.8.2007 kl. 21:42]

Hæ krúttó, já það er stefnan að mæta beint af vellinum. Kippum kannski Nínu með í Mosó.

[Guðríður Hrefna Haraldsdóttir, 10.8.2007 kl. 23:41]

Jesssssssssssss!