Dóttur minni brá aðeins ...

... þegar ég fór að tala um bleika þvottavél hér í fyrri pistli. Hún trúði því alveg að ég hefði spreyjað þvottavélina bleika. Mér fannst það nú alveg óþarfa áhyggjuefni, þangað til ég mundi allt í einu eftir því þegar ég fékk nóg af plastfurueldhúsinnréttingunni okkar, sem hékk til bráðabirgða í eldhúsinu í yfir tuttugu ár. Eina nóttina tók ég rúllu af sjálflímandi plasti og límdi yfir allar hurðarnar á eldhúsinnréttingunni, bleikt, nema ein hurðin fékk að vera lillablá. Mjög stolt af þessu og dóttir mágkonu minnar var líka hrifin af framtakinu. Hmmm já, það held ég hafi verið allt og sumt af hrifningu. Ætli það hafi ekki verið að næturþeli nokkrum árum síðar sem dóttir mín tók að rífa þetta aftur af og þegar ég lauk verkinu fannst mér plastfuran bara ágæt. En núna er loksins komin alvöru eldhúsinnrétting.

Og eins og höfundurinn segir í hinni frábæru bók Litli prinsinn: ,,Börn, varið ykkur á baóbabtrjánum" þá segi ég: ,,Börn, varið ykkur á húsbyggingum." Við byggðum barnung og blönk og erum enn að endurbyggja, laga og bæta það sem gert var af vanefnum. En stundum er það reyndar bara gaman, eins og í kvöld, þegar við tókum enn eina ,,seinustu" steypu af flotinu uppi á lofti. Við héldum að þessi væri raunverulega sú seinasta. En sennilega þurfum við bara að taka eina litla bunu á þriðjudag til að klára. Sennilega. 

Athugasemdir

[Jenný Anna Baldursdóttir, 25.6.2007 kl. 00:43]

Gangi þér vel með þetta "örlitla" sem þú átt eftir Anna mín.

[Anna Ólafsdóttir Björnsson, 25.6.2007 kl. 00:47]

Takk, þetta hefur gengið svo ljómandi vel, en bara einum of oft

[Jóhanna 25.6.2007 kl. 11:30]

Finnst þér skrítið að ég hafi haft áhyggjur, ég man líka eftir prufunni á ískápnum gamla. (Nb. mér fannst hann flottur svartur). Svo rámar mig í eins og alla vega einn skáp í viðbót (hint þar sem stiginn er...).

En svona praktískar áhyggjur af ykkur, eru þið að drekkja ykkur í millimetrunum, þarna uppi eða hvað...

[Anna Ólafsdóttir Björnsson, 25.6.2007 kl. 18:59]

Já, feðgarnir eru gersamlega að drukkna í millimetrapælingum, ég væri löngu hætt, en maður á ekki að vera með tvo réttindamenn í mælingum í svona löguðu ;-) - Plastið er snilldarlausn reyndar. Ég fékk mitt í rúllum byggingavöru eða málningavöruverslun, en síðan er alllangt og hef ekki verið að svipast um eftir svoleiðis nýlega. Aftan á þessu er pappír sem maður flettir frá en það er svolítið nákvæmnisverk að setja þetta slétt á, lærist fljótt. Ef smá loftbólur koma er best að stinga á þeim með nál og nudda niður í kring, sést ekkert ;-)