Snjór í sumarveðri og kuldaskræfur frá Íslandi

Hér í New Mexico hefur verið sumarveður að undanförnu, öll tré í fullum blóma og apríkósutrén slá fallegu kirsuberjatrjánum næstum við í fegurð. En hmmm, hér erum við systurnar samankomnar um páskana og úti er snjór og frost. Ferðinni til Santa Fe hefur verið frestað um dag vegna hálku. Við höfum það hins vegar yndislegt á heimili Nínu systur okkar hér í Portales. Hér var fjöldi vina hennar og Anniear systurdóttur okkar í gærkvöldi, rosalega skemmtilegt fólk. Öllum finnst mjög fyndið hvað íslensku systurnar eru miklar kuldaskræfur ;-) en hér kunna ALLIR brandarann um að Ísland ætti að heita Grænland og öfugt.

Hér spyr fólkið eins og á Íslandi: How do you like Portales? En þá er líka búist við því að við svörum: Hriklalega ljót, þvi öllum hér finnst Portales mjög ljótur bær. Þetta er 12 þúsund manna háskólabær og Nína var búin að vara okkur við að bærinn væri með afbrigðum ljótur, og satt að segja er ég ekki frá því eftir smá rúnta hér, að hún hafi rétt fyrir sér. Allir brosa hringinn þegar maður segir varlega: Mér finnst háskólasvæðið fínt og húsið hjá Nínu! Og svo er bara talað um ljótleika bæjarins. Skrýtið! En við höfum það afskaplega gott hér í í flatneskjunni og hlökkum til að komast til hinnar gullfallegu borgar Santa Fe þar sem okkar bíður indjánapartí.

Athugasemdir

[Guðríður Hrefna Haraldsdóttir, 7.4.2007 kl. 16:46]

Góð kveðja til ykkar þarna westur! Vonandi færðuð þið Nínu íslenskt páskaegg!

[HG 7.4.2007 kl. 17:28]

Samgleðst og haldið áfram að njóta hverrar stundar. Gleðilega páska!

[Jóhanna 7.4.2007 kl. 19:45]

Jú, spennandi.

Skemmtið þið ykkur frábærlega í ameríkunni. Bið svakalega vel að heilsa öllum og hlakka til að að sjá þig í maí.

Sendi þér mail áðan.. Elska þig, Hanna.

[Katrín Snæhólm Baldursdóttir, 8.4.2007 kl. 00:25]

Ohhhh minnir mig á Snta Fe fyrir 2 árum síðan. Findu Cow Girl bar ...ferlga sérstakur staður....og endilega heimsæktu 10.000 waves í fjöllunum og fáðu þér nudd þar. Hrein dásemd. Svo auðvitað verðuru að fara í listahverfið.....og hlusta á alla spekinga andlegu málanna sem þarna eru. Santa Fe er vagga lista og andlegra mála.  Svo má ekki gleyma falllegustu bókabú ever..sem samanstendur af mörgum hefbergjum og skotum yfirfulum af góðum bókum..fatnaði, reykelsum og fallegum hlutum....bara hreint yndi. Indíánaborgirnar þarna í kring eru heldur engu líkar...en sorgleg hverfin sem indíánarnir fá að úa í eftir að hafa verið hraktir burtu af sínum heimasvæðum.Santa Fe er einstakur staður AÐ heimsækja. Grískur sem ég mæli með í miðbænum...faðir eigandans er sá sem var á öllu frímerkjum og posterum...hermaðurinn með sígó í munninum..velþekktur um allan heim.

Góða skemmtun..bið að heilsa lófaspákonunni sem er með blikkandi ljósaskilti fyrir utan hjá sér..eins takkí að það sýnist er hún samt góð!

[Salvör Kristjana Gissurardóttir, 8.4.2007 kl. 16:31]

Ég fór til Santa Fe fyrir meira en áratug. Falleg borg og stílhrein og gaman að sjá hversu mikil indjánaáhrifin eru og hvað mikið er lagt upp úr listum. Það sem ég man samt best er að stutt fyrir utan borgina fórum við í indjánaþorp á "reservation". Við furðuðum okkur á því að það virtist enginn vera þarna, allt mannlaust og við sáum engin merki um fólk nema á stöku stað þá voru skinn af nýveiddum dýrum hengd upp þannig að við sáum að enghverjir hlutu að búa þarna. Svo runnum við á skiltin hinu megin við þjóðveginn, það var einhver opnunarhátíð í gangi. Við komum þar að og sáum að þar var verið að opna spilavíti. Einbeittir indjánar klæddir í smóking voru að reyna að læra á spilavélarnar, það voru á öllum vélum einhverjir þjálfarar að þjálfa upp indjána til að reka spilavítið. Ég man ennþá eftir öllum þessum andlitum indjánanna -áhyggjufullir og einbeittir að læra eitthvað nýtt og flókið og klæðnaði þeirra - þeir voru allir í smóking eða einhver konar svarthvítum fötum og með hvíta hanska.

Þetta var dapurleg sjón. Ég veit vel að spilavítin hafa staðið undir miklu af því sem hefur verið gert undanfarin ár á verndarsvæðum indjána en þau voru líka merki um uppflosnun og niðurbrot menningar. 

[Anna Ólafsdóttir Björnsson, 12.4.2007 kl. 22:09]

Spilavítin eru ákaflega umdeild, enn umdeildari en spilakassar SÁÁ og Háskólans (ásamt fleiri) hér á landi. Það er margt sem hefur átt þátt í uppflosnun indjánanna, en margt vel gert á Santa Fe svæðinu líka. Fólkið sem ég var að heimsækja átti það sammerkt að vinna með eða í tengslum við samfélag indjánanna og í þeirra hópi voru reyndar líka indjánar. Mjög áhugavert að fá að kynnast fólkinu í og við Santa Fe. Skrifa vonandi meira fljótlega.

[Anna Ólafsdóttir Björnsson, 12.4.2007 kl. 22:11]

Og, Gurrí mín, jú auðvitað færðum við Nínu páskaegg, og Annie og Denise og Cheryl á Santa Fe svæðinu.