Dylan dillan

Ég var mjög stolt þegar ég skrifaði grein undir þessari fyrirsögn í Vikuna fyrir óralöngu. Hélt að allir myndu skilja orðaleikinn. Þegar ég bjó sumarlangt í efri koju einhvers staðar suður í Englandi átján ára gömul var mjög flott plakat af Dylan límt í loftið, þótt ekki geti hann nú talist fríður maður þá var þetta plakat sérlega fallegt í haustlitunum. Núna þegar kappinn er sjötugur, þá er ég enn komin með ,,dillu“ fyrir Bob Dylan og hlusta á Just Like a Woman, Rainy Day Woman, Like a Rolling Stone og öll hin flottu Dylan lögin í gríð og erg.

Lög sem verða fallega ósannfærandi

Einhvern tíma hef ég skilgreint (hluta af) tónlistarsmekk mínum á þann hátt að ég hefði dálæti á laglausum karlmönnum og greindarlegum stúlkum. Ekki þarf að fjölyrða um greindarlegu stúlkurnar, Björk, Susan Vega og núna seinast Láru Rúnars með lagið Honey, you are Gay, sem mér finnst alveg æði. En ég var að gera aðra uppgötvun varðandi laglausu karlmennina, þeir hafa einstakt ,,lag" á að syngja kraftmikil lög svo veiklulega að þau verða ósannfærandi en um leið eru sum þeirra alveg lygilega skemmtileg. Barði Jóhannsson söng ,,Stop in the Name of Love" þannig að það hefði ekki stoppað kjaft

og hljómsveitin Cake á heimsmet í ósannfærandi flutningi á laginu ,,Í will survive" og álitamál hvort hljómsveitin komst lifandi í gegnum flutning lagsins.

Góð helgarpæling.

Youtube verður sífellt betri - hér er ein ómetanleg perla

Lengi hef ég fagnað tilvist Youtube, en nú er ég farin að finna þar gersemar sem áður var ekki að finna þar. Hér er ein þeirra, ,,rétta" útgáfan af Surabaya Johnny eftir Kurt Weil, sem eiginkona hans, söngsnillingurinn Lotte Lenya, syngur:

 

Að ,,týna" lögum ... Guðjón bak við tjöldin eftir Atla Heimi og fleiri gersemar

Býst við að margir hafi lent í því sama og ég, að ,,týna" lögum tímabundið, kannski árum eða áratugum saman. Frumflutningur á Gunnarshólma Atla Heimis ýfði eitt gamalt ,,týndralaga" sár, ég bara VERÐ að finna einhvers staðar ,,Guðjón bak við tjöldin" snilldartexta Þórarins Eldjárn við lag Atla Heimis Sveinssonar. Hef orðað þetta við skólasystkini mín úr Menntó (útskrift 1972) fyrir ótrúlega daufum eyrum. Þó sungum við þetta lag með öðru lagi en hinu ágæta lagi Harðar Torfasonar - en ég sakna þess upprunalega sárt. Fattaði auðvitað ekkert að biðja minn gamla kennara, Atla Heimi, að leiða mig á rétta slóð og geri það sjálfsagt ekki, við hittumst sjaldan.

En fátt er svo með öllu illt og allt það. Þetta leiddi mig á slóðir fleiri týndra laga og með hjálp elsku YouTube fann ég eftir margra ára hlé eitt af fallegustu lögum sem ég hef heyrt, það sem villti um fyrir mér var að í þeirri útgáfu sem ég heyrði á sínum tíma var textinn ekki eins, þá var nefnilega til sameinuð Júgóslavía.

 

Ekki bara pólitík ... smá tónlistarsagnfræði: Kinks á Íslandi 1965, ásamt Tempó og Bravó

Á síðu Dr. Gunna á Eyjunni og áður hjá Agli Helgasyni er að finna tengil á upptöku frá tónleikum Kinks í Austurbæjarbíói. Þetta er tónlistarsagnfræði af bestu gerð og þar að auki staðfestir þetta myndband það sem mig minnti, þetta voru ótrúlega flottir tónleikar. Trúi því varla að þetta hafi verið árið 1965, það merkir nefnilega að ég hef ekki verið nema 13 ára í æpandi mannhafinu sem sótti tónleikana, fékk meira að segja sæti frekar framarlega, þannig að ef þið sjáið stelpu með sítt hár, topp og svört ,,Manfred Mann" gleraugu - austarlega í salnum (fyrir ykkur sem eruð áttvís í Reykjavík) á ca. 7.-8. bekk, þá gæti það verið ég, en hef ekki leitað af neinu viti.

YouTube býður ekki uppá að fella þetta myndskeið inn í aðrar síður en hér er tengillinn og njótið vel:

http://www.youtube.com/watch?v=t3oe0k9KyOA 

 

Tónlist, tónlist, tónlist og eitt svona rétt á mörkunum

Hef verið að drífa í að hlaða fullt af gömlum og nýjum geislaplötum í iPodinn minn. Finn nú ekki alla, meðal annars ekki þennan sem ég hafði mikið fyrir að finna, en í staðinn leyfi ég fleirum að njóta:

 

Rúnar Júlíusson - rokkari deyr

Rúnar Júlíusson er löngu búinn að ávinna sér titilinn Herra Rokk á Íslandi. Ímynd rokksins - spilandi með ótal nýjum og gömlum hljómsveitum og alltaf sívirkur. Frá því ég var smástelpa að þvælast í skáttaheimilið við Snorrabraut á laugardögum milli kl. þrjú og fimm síðdegis til að hlusta á Hljóma og til seinni tíma ævintýra Rúnars, GCD fannst mér reyndar alltaf ein skemmtilegasta hljómsveitin sem hann tók þátt í, en það var líka gaman að sjá hann hanga í diskókúlunni (eða kannski voru það loftbitar) í Hollywood og gera þetta hrikalega diskótek að paradís rokksins einhverjar kvöldstundir. Og snilldarlagið ,,Pabbi þarf að vinna" sem er með ónothæfri upptöku á YouTube er líka mjög skemmtilegt, einmitt vegna þátttöku Rúnars. Hans verður sárt saknað, hér er hann með Unun:

 

Kór eftir Verdi (stundum kallaður Steðjakórinn)

Selkórinn endaði afmælisdagskrána sína með frekar metnaðarfullum kór eftir Verdi, sem minnti mig á að hlaða Verdikóra-disknum mínum niður á ipodinn minn (sem ég hef heyrt kallaðan spilastokk, góð hugmynd sem kannski venst). Svo vorum að að ræða tónlist í Myndlistarskólanum í Kópavogi og ég lofaði að muna eftir að koma með Verdi-diskinn í skólann þegar ég kemst næst, sem verður væntanlega á fimmtudag, svo við getum nú nýtt nýju græjurnar okkar þar. Flottar græjur, BTW, afmælisgjöf frá nemendum ásamt skápnum undir. En það er vetur, stemmning fyrir flottum kórum svo hér er steðjakórinn eftir Verdi (Anvil Chorus samkvæmt YouTube og fullt af öðrum nöfnum eflaust):

 

Fallegt lag sem fáir þekkja - en er samt svo kunnuglegt

Held ég hafi ekki heyrt þetta lag fyrr en árið 1993, þegar ég átti leið um Ástralíu, þetta var greinilega uppáhaldslag píanistans á barnum á hótelinu mínu, og hann var virkilega flinkur. Grennslaðist fyrir um lagið, það heitir Jessica's Theme, heyrði það í nokkrum öðrum útgáfum, það er ástralskt, úr myndinni: The Man from the Snowy River með Kirk Douglas og fleiri góðum, undarlega kunnuglegt lag, þótt ekki hafi mjög margir séð myndina, held ég, enda er hún frá sjötta áratugnum. En alla vega, njótið vel:

 

Þetta er reyndar ekki besta útgáfan sem ég fann, hún er hér (linkur - YouTube vill ekki að við fellum þessa útgáfu inn í síðurnar okkar):

http://www.youtube.com/watch?v=PMR7oHJoXTA

Dresden Dolls spila Lotte Lenya

Pönkuð útgáfa af Lotte Lenya. Hélt ekki að svoleiðis væri til. En svo kynntist ég Dresden Dolls (skotið því miður stutt en með lagi sem Lotte söng gjarnan):