Stígamótaheimsóknin á föstudaginn

Segja má að 8. mars hafi komið snemma þetta árið því þessi baráttudagur kvenna er jafnframt sá dagur sem í mínum minni tengist Stígamótum órjúfanlega. 8. mars 1990 voru samtökin stofnuð og á föstudaginn var haldið upp á 19 ára afmælið.

Það var skrýtið að horfa til baka til ótrúlega minnisstæðs fundar í kjallaranum neðst á Vesturgötunni - hvort það var í húsi Stígamóta eða innar í portinu í Hlaðvarpanum get ég ekki gert upp við mig þótt ég muni hvar í salnum ég sat. Þarna voru ótrúlegar frásagnir þolenda kynferðisofbeldis opnuðu augu margra fyrir því meini sem verið var að taka á og hefur verið hlutverk samtakanna æ síðan. Ég held að enginn sem þar var staddur verði nokkurn tíma samur. 

Síðan hefur margt gerst, umræðan þroskast, lagabreytingar orðið en því miður hafa vandamálin sem við er að glíma ekki orðið minni. Mansal er staðreynd og aðrar hræðilegar staðreyndir er fjallað um í nýútkominni skýrslu Stígamóta sem komið er út og væntanleg fljótlega á netið á www.stigamot.is

Athugasemdir

[Helga 9.3.2009 kl. 00:49]

Tek undir það með þér að þessum fundi gleymir maður aldrei. Þarna opnaðist fyrir mér veröld sem ég hélt að væri hvergi til. Og síðan hefur komið í ljós að þessi andstyggilega veröld er andstyggilegri en kom fram á fundinum og sífellt bætir þessi andstyggilega veröld við sig enn andstyggilegum birtingarmyndum.

[Jenný Anna Baldursdóttir, 9.3.2009 kl. 08:01]

Ég var þarna, þetta var á þeim tímum sem fólk vildi trúa því að á Íslandi væri ekki kynferðisofbeldi.  Það væri bara í útlöndum og ég er ekki að grínast.

[Anna Ólafsdóttir Björnsson, 9.3.2009 kl. 11:49]

Nokkrum árum fyrr var ég að berjst fyrir því að Kvennaathvarfið fengi smá styrk frá Bessastaðahreppi og þá sagði einn félagi minn í hreppsnefnd: - Já, en það eru ekki konur þarna frá ALFTANESI? Ég svaraði: - Þú getur verið alveg viss um að það eru konur þarna frá Álftanesi eins og annars staðar frá, en þú getur verið eins viss um að þú færð seint að vita það.