Sunnudagur og enginn fundur ;-) - forval hjá VG í suðvestrinu um næstu helgi - þá get ég loksins kosið sjálf - og stóru fréttirnar í íslenskum stjórnmálum í dag

Skrýtið, kominn sunnudagur og enginn fundur. Sóttum listaverk Óla (blaut) á Kaffi Cultura áðan í hífandi roki en allt tókst það nú samt, nema eitt verkið (af 12) fékk smá skell og verður ögn lífrænna en hin. Fékk hringingu, einn lítill og sætur fundur á morgun og svo ætla ég bara að taka lengri dag í verkefnum á morgun en tími hefur gefist til að undanförnu vegna funda. Stutt í næsta fjör, um næstu helgi get ég sjálf kosið í forvali VG - af því ég gat jú ekki kosið sjálfa mig í gær þá er gaman að geta kosið fríðan lista fyrir suðvestrið í VG. Þarnæstu helgi verður landsfundur VG og mér finnst miklu varða að vel verði staðið að ESB-stefnu okkar ágætu hreyfingar. Annars blanda ég mér aðallega í jafnréttis- og kvenfrelsismál hreyfingarinnar enda er það minn grunnur í pólitík.

Stóru fréttirnar í íslenskri pólitík í dag tengjast Ingibjörgu Sólrúnu Gísladóttur. Ég vona það heitt og innilega að ákvörðun hennar sé byggð á því að hún vilji hlífa sér og safna kröftum en ekki að henni hafi versnað. Mun fylgjast grannt með. En stór er þessi frétt óneitanlega. 

 

Athugasemdir

[Hilmar Gunnlaugsson, 8.3.2009 kl. 20:05]

Ég hallast sjálfur að þjóðaratkvæðagreiðslu um ESB og tel þann kost vera hinn eina lýðræðislega í stöðunni. Leiðar voru fréttirnar um Ingibjörgu, vona ég að hún nái sér fljótt og komi sterk til baka.

[Anna Ólafsdóttir Björnsson, 8.3.2009 kl. 20:11]

Ég er mikil áhugakona um þjóðaratkvæðagreiðslur, það þarf að finna því form sem er ekki of kostnaðarsamt fyrir samfélagið og ég hef fulla trú á því að það sé hægt (sagt eftir góðar umræður við konu sem ég met mikils).

Varðandi stórar ákvarðanir af því tagi sem aðildarviðræður við ESB og enn frekar innganga í sambandið er, þá tel ég að aukinn meirihluti sé skynsamlegasta leiðin við slíka ákvarðanatöku. Við höfum séð atkvæðagreiðslur eins og um flugvöllinn í Reykjavík - sem leiða ekki til neinnar niðurstöðu. 

Ingibjörg Sólrún er óvenju sterk kona og núna vona ég að hún geti beint öllum sínum mikla styrk til þess byggja sig upp.