Baráttusöngvar á Útvarpi Sögu uppúr eitt - laugardag

Um daginn var ég komin í þann gírinn að finna til baráttulög sem sárabætur fyrir að komast ekki í mótmælin - vegna pestar og smá ábyrgðartilfinningar vegna þess að heilsan mín var ekki í einkaeigu minni meðan ég var búin að skuldbinda mig til þess að keppa fyrir Álftanes í Útsvari. Á morgun trítla ég af stað uppúr hádegi með smá lagasafn og verð um 13:15 í þættinum hans Halldórs og félaga hans að spila nokkur sýnishorn. Þetta eru baráttusöngvar sem mér finnst eiga að syngja.

Ef ég verð ekki búin með útivistarkvótann ætla ég að skjótast á mótmælin á eftir, finnst nú eiginlega að ég eigi að hlusta á hann Guðmund Andra sveitunga minn og fleira gott fólk og svo finnst mér nauðsynlegt að vera með einmitt núna - mótmælin hafa borið einhvern árangur en enn er mikilvægt verk óunnið.

Búin að lesa umræðu á blogginu og í fréttum og er furðu lostin. Það er barnaskapur að blanda saman tilgangi mótmælanna og þeim einstaklingum sem eiga nú um sárt að binda vegna veikinda og eru í sviðsljósinu. Ég get ekki neitað því að ég tek veikindi fólks sem ég þekki nærri mér og því miður hefur verið talsvert af slíku í kringum mig seinustu 2-3 árin, fæst af því sem alþjóð hefur nokkuð haft spurnir af. En það breytir ekki sannfæringu minni.

Athugasemdir

[, 24.1.2009 kl. 09:56]

Vel sagt - ekki skyldi rugla saman persónulegum aðstæðum stjórnmálamanna og tilgangi mótmælanna.

[Sædís Hafsteinsdóttir, 24.1.2009 kl. 12:23]

Sammála siðasta ræðumanni,biðjum frekar fyrir bata hja geir og ingibjörgu

[Þráinn Jökull Elísson, 24.1.2009 kl. 12:26]

Sammála ykkur, Dagnýju og Sædísi!

[utvarpsaga ehf 24.1.2009 kl. 18:42]

Mikið var gaman að hlusta á þig á Útvarpi Sögu í dag. Lögin sem þú valdir rifjuðu upp gamla og góða tíma. Þetta var hrein snilld hjá þér. Takk fyrir að koma til okkar.