Stysti dagurinn

Upplifi tvo stystu daga ársins í þetta sinn. Stóð endilega í þeirri meiningu að 21. desember væri stysti dagur ársins en svo var það 22. des. í þetta sinn alla vega. Slétt sama, mér líkar ágætlega við skammdegið og myrkrið en samt er alltaf gaman að fylgjast með deginum lengjast. Þótt ég sé ekki eldheitur aðdáandi kulda og gallharður andstæðingur hálku þá finnst mér veturinn oftast ágætis árstíð.  Sumarið líka. Haustið markar endalok sumarsins og af þeim sökum ekki (lengur) í uppáhaldi hjá mér og vorið er yfirleitt of kalt til að ég kunni að meta það. Þegar litgreiningarfárið gekk yfir landið var ég lauslega greind sem sumar eða vetur, mjótt á mununum, en alls ekki sem vor og haust. Passar ágætlega við smekk minn á árstíðum. Mig minnir að Steinunn Sigurðardóttir hafi sagt í einhverju ljóða sinna (finn ekki réttu ljóðabókina eftir hana, þessa litlu rauðu): Það eru svik í þessu vori, eins og brosi hrekkjusvínsins ...

 

Athugasemdir

[Sigurður Sveinsson, 22.12.2007 kl. 18:01]

Minn tími er hin nóttlausa voraldar veröld. Nú vinnur birtan smátt og smátt sigur á myrkrinu. Bestu jóla- og  nýárskveðjur til þín og fjölskyldunnar með þökk fyrir pistlana.

[Guðríður Hrefna Haraldsdóttir, 22.12.2007 kl. 18:29]

Hæ elskan mín. Já, ég vissi að vetrarsólstöður yrðu 22. des að þessu sinni vegna greinar sem ég skrifaði í Vikuna, annars hefði ég örugglega skellt þeim á 21. des. Eigum við ekki að segja að þeir hafi verið álíka stuttir ...

Ætlunin er að kíkja á þig á morgun, Þorláksmessu, með risastóran pakka. Hringi áður.

[Anna Ólafsdóttir Björnsson, 22.12.2007 kl. 22:37]

Mér finnst bara fínt að fá tvo stystu daga. Meira spennandi, en nóttleysið er líka heillandi, þótt ég hafi átt mér nokkur sveitaballaár í Rangarvallasýslunni þegar maður kom úr dimmu, reykmettuðu umhverfi með ærandi hávaða út í sól og blíðu með fuglasöng fyrir utan Hvolinn og alltaf jafn hissa. Eins gott að ég bragðaði ekki áfengi í þá daga, annars hefði ég ekki trúað mínum eigin augum ;-)

[Jóhanna Magnúsar- og Völudóttir , 22.12.2007 kl. 22:58]

Þessir stuttu dagar geta reynst langir!

[Anna Ólafsdóttir Björnsson, 23.12.2007 kl. 01:28]

Já, hann var drjúgur þessi seinni stutti dagur og sá fyrri var bara alveg þokkalega langur líka.

[Anna Ólafsdóttir Björnsson, 23.12.2007 kl. 01:30]

Hlakka til að sjá þig, Gurrí, ég verð sennilega heima allan daginn (sofandi til hádegis, vonandi) og það verður bara gaman að fá þig hingað og taka pásu í heimilisþrifunum, vonandi verður risajólatré komið upp, það er bara verið að bíða eftir seinustu steypuvinnunni (já, þú heyrðir rétt) til að geta lagt seinasta parkettið, og ekki nema rétt komið fram yfir miðnætti 22. des. ;-)