Gróf upp gamla plötu með Scaffold

Bítillinn Paul McCartney á bróður sem heitir MikeMcGear (sá breytti nafninu af því hann var orðinn leiður á að bera sama nafn og bróðirinn). Mike er fínt ljóðskáld og var þar að auki í skálkahljómsveitinni Scaffold. Flott hljómsveit, ekki spurning, Thak U very much og Lily the Pink þekktustu lögin. Einu sinni átti ég þessa fínu plötu með Scaffold, sem er bæði með ljóðum og alls konar lögum, sú hét Fresh Liver. Gaf vini mínum, sem langaði rosalega í hana, eintakið mitt og sé svo sem ekkert eftir því. En af og til hefur mig aftur langað í gripinn en hann var illa uppseldur þegar ég loks fór að hafa fjárráð til ferðalaga og fjárfestinga á borð við græjur. Tónlistarveitur á netinu hafa ekki getað reddað mér þessari gersemi fram til þessa, en í dag fann ég plötuna á netinu og pantaði. Þótt hún sé óþarflega dýr þá hlakka ég mikið til að fá hana í hendur. Það sem meira er, ef þetta virkar rétt, þá sýnist mér að ég sé búin að finna náunga sem tekur að sér að finna alls konar fágætar plötur, þannig að kannski maður eigi eftir að tékka líka á Bonzo Dog og Napoleon XIV við tækifæri, alla vega þeim síðar nefnda. Seinast þegar ég vissi var Róbert Trausti Árnason fv. forsetaritari eini maðurinn sem átti eintak af stóru plötunni hans Napoleons og það eintak hlýtur að vera orðið æði slitið. 

Athugasemdir

[Steinunn Helga Sigurðardóttir, 23.3.2007 kl. 05:03]

frábærtfyrir þig að finna þessa fágætu plötu !

fallegan dag til þín með ljósi

steina 

[Jenný Anna Baldursdóttir, 23.3.2007 kl. 12:21]

Bróðirinn mun nú látinn er mér sagt.  Ég og húsbandið höfum keypt fágætar plötur á e-bay enda er þetta áhugamál.  Erum við fortíðarfíklar Anna mín?

[Anna Ólafsdóttir Björnsson, 23.3.2007 kl. 13:02]

Ó, vont mál að hann skuli ekki hafa tórað lengur, hann var ágætis skáld. Fortíð, nútíð og framtíð, tónlist er bara yfirhöfuð spennandi. Sem betur fer er fullt af góðri nýrri tónlist til, en ég hef elt eina og eina plötu út um allt, til dæmis plötuna sem ,,au pair" lagið hennar Bjarkar var á (Short term affair) þar sem ég fann seinasta eintakið í London.

Annars var við lýði heima hjá mér í 17 ár svokölluð ,,sunnudagskvöld" þar sem vinir og kunningjar mættu á sunnudagkvöldum og í nokkur ár var mikið um að við skiptumst á óvenjulegri tónlist, einn vinur okkar sérlega liðtækur í þeim efnum, og svo átti ég þokkalegt safn líka, t.d. 22 útgáfur af Stairway to Heaven úr áströlskum þáttum og bæði ungverskt og spánskt rapp/hiphop (Tiro de Gracia bera af) auk þess sem ég á einhvers staðar í fórum mínum Singapore-ska kántríplötu (Singapore cowboy, so far away from home ...). Saknaði oft Fresh Liver á þessum sunnudagskvöldum. En mig vantar húsband ... ;-)

[Þórleifur S Ásgeirsson 24.3.2007 kl. 08:20]

Ég á Napóleon 14nda og hef komið honum á stafrænt form og eitthvað af Monty Python afleggjaranum The Bonzo Dog Doo Dah Band ( Neil Innes og Vivian Stanshall ) Og ég á umrædda Stairways to heaven úr þáttunum The money or the gun, sem ég hef ekki séð einn þátt af, en ku vera góðir. The worlds worst records er líka athygli verð, þar kynntist ég The Shaggs ( Þrjár laglausar systur úr Bandaríkjahreppi) húmorinn vellur af þeim.

Áhugi á furðulegri tónlist hefur alla tíð verið mitt vandamál og oftast var mér hent út úr samkvæmum í æsku með plöturnar mínar. En ég læt mér ekki segjast, og í þessum skrifum er ég að hlusta á Bestemamma Ravn með Kurt Foss og Reidar Böe

SNILLDAR LAG