Húrra Sóley og tekst að þökuleggja hægri pólitíkina?

Umræðan um klám var að komast í hreinasta öngstræti hjá gestum Egils Helgasonar þegar Sóley Tómasdóttir hreinlega jarðaði allt ruglið í sumum hinna gestanna í þættinum og skildi mannskapinn eftir kjaftstopp. Egill hafði vit til að stoppa umræðuna þar, enda var ekki meira um málið að segja eftir áhrifaríka lýsingu Sóleyjar á nöprum veruleika þessa iðnaðar og fórnarlamba hans. Húrra Sóley.

Svo mætti Ómar til leiks. Hann boðar, eins og á bloggsíðunni sinni, framboð innan skamms. Nú á að leggja grænar þökur yfir hægri og miðsvæðin í pólitík, það er að segja ef það tekst. Ég óska Ómari og félögum alls góðs í þeirri viðleitni sinni og vona að hann beri gæfu til að sitja ekki uppi með of marga kverúlanta eða lið sem ekki fær byr hjá öðrum flokkum (lengur) og tek fram að ég er alls ekki að tala um Margréti Sverris og hennar fylgismenn, því það er að mínu mati hópur fólks sem í rauninni er hinn eiginlegi Frjálslyndi flokkur, þótt innkoma annarra lukkuriddara hafi hrakið þau úr flokknum. Forvitnilegt að sjá hvernig til tekst. Við fáum víst að vita það innan 10 daga.

 

 

Athugasemdir

[SM, 4.3.2007 kl. 19:00]

var flott hjá henni. Margir hafa svo furðulegar hugmyndir um þessi hugtök sem þarna voru til umræðu og mýtan um hamingjusömu vændiskonuna er enn ansi sterk.

[BIT 5.3.2007 kl. 10:11]

Get ekki tekið undir með þér að Sóley hafi jarðað allt ruglið sem fram kom.  Ekki nema þá að hún hafi jarðað ruglið með rugli.  Undarlegt að vera á móti klámi en geta ekki skilgreint klám.  Hún kom mér frekar fyrir sjónir í þessum þætti eins og pirraður smákrakki en alvöru stjórnmálamaður.  Upphrópanir eins og "Oh my god!"  á meðan hún ranghvolfdi augunum finnst mér ekki traustvekjandi og málstað hennar ekki til framdráttar.

[Jenný Anna Baldursdóttir, 5.3.2007 kl. 11:18]

Sóley stóð sig vel, eins og hún á kyn til.  Skellegg ung kona sem ég og fleiri væntum mikils af í framtíðinni.  EKKI leiðinlegt að eiga hana og fleiri konur í vinstri grænum.