Nú er það nánast hnífjafn á toppnum - og góð röksemd fyrir orðinu Edda

Núna er nánast orðið hnífjafnt á toppnum í fegurðarsamkeppni íslenskra orða. 0.3 % atkvæða skilja á milli kærleika í fyrsta sæti og ljósmóður í öðru sæti (nema það breytist nema það breytist meðan ég pikka þetta inn). Svo fæ ég margar góðar ábendingar og reyni að koma orðunum á framfæri hér á síðunni eða í athugasemdum, enda mun ég taka saman öll tilnefnd orð og vinna á einhvern hátt úr því einstaka hráefni.

Í gærkvöldi spjallaði ég við töffaralegan mótorhjólakappa við þjóðveg 1 á Vesturlandi og hann lýsti ánægju sinni með öll þessi fallegu orð, hafði rekist á þau á vefnum. Og í athugasemdunum sé ég ýmislegt, meira að segja eitt sem ég ætla að draga hér fram á forsíðuna, stóðst ekki mátið, en lofa ekki að endurtaka það:

,,Þetta er góð hugmynd. En ég skal segja þér hvað fallegasta íslenska orðið er að mínu mati.

Fyrst eru hér rökfærslur:

Orðið er fallegt á blaði

Það er stutt og laggott og hljómar vel í munni

Það hefur fleiri en eina meiningu

Það er afar gamalt og hefur fylgt tungumálinu frá byrjun

Ef þetta væri alþjóðleg keppni myndi það sennilega blanda sér í toppbaráttuna.

Fallegasta orðið í íslenska tungumálinu er:

EDDA

Mér er full alvara með þessu og kalla eftir viðbrögðum. Ég myndi meta það mjög við þig ef þú gæfir þessu orði smá byr undir déin."

 

Athugasemdir

[Jenný Anna Baldursdóttir, 25.7.2007 kl. 20:51]

Edda já, það er yndislegt orð.  Þætti ekki leiðinlegt að sjá það blanda sér í toppbaráttuna (ég er farin að tala um þetta eins og íþróttakeppni).

[Anna Ólafsdóttir Björnsson, 25.7.2007 kl. 21:08]

Hugsunin er einmitt að ná upp keppnisandanum sem fylgir íþróttum, að fá fólk til að ,,berjast" fyrir orðinu sínu - spennan magnast við svona hnífjafna keppni. 

[Helga 25.7.2007 kl. 21:40]

Ég get ekki sagt að mér finnist orðið edda vera fallegt. En væri þetta fjölþjóðleg keppni þá þykir mér ekki ólíklegt að það ætti möguleika; annars vegar vegna þess að margar þjóðir geta án erfiðleika borið það fram og hins vegar vegna þess að það á sterkar sögulegar rætur í norrænu. Um það er Andri Snær miklu færari að ræða en ég og þess vegna fylgir hér með slóð inn á skýrslu samgönguráðuneytisins þar sem m.a. er grein Andra Leitin að Mónu Lísu http://samgonguraduneyti.is/media/Skyrsla/menningartengd_ferdathonusta.PDF

Greinin er á bls. 63.

Er þetta ekki réttri vettvangurinn til að vekja athygli á orðinu dalalæða?!

[Anna Ólafsdóttir Björnsson, 25.7.2007 kl. 21:50]

Júhú, dalalæða á enn möguleika. Og takk, ég þarf greinilega að fara að lesa.

[Anna Ólafsdóttir Björnsson, 25.7.2007 kl. 22:16]

Evrópusöngvakeppni fugla, það hljómar vel.

[Anna Sigríður 26.7.2007 kl. 00:08]

... keppnisandinn og baráttan fyrir uppáhalds orðinu :-) ... eins og ég hef áður sagt þá finnst mér „dalalæða“ fallegasta orðið! Af því að nú sit ég við aðra tölvu þá gef ég dalalæðu annað atkvæði... skilst að það sé löglegt í þessari fegurðarsamkeppni.

[Unnur 26.7.2007 kl. 00:19]

Öll þessi orð og svo mörg mörg fleiri eru undurfögur. Ljósmóðir fær mitt atkvæði, svo maður blandi sér í úrslitabaráttuna!

[Edda Agnarsdóttir, 26.7.2007 kl. 10:36]

Ljósmóðir er það orð sem mér finnst best.

[Jón Steinar Ragnarsson, 26.7.2007 kl. 15:11]

Ég kvitta fyrir þessu en vil benda á að mér finnst margir fara villur vegar hér í að túlka meiningu eða innihald orða og meta fegurð þeirra eftir því.  Orðið sem slíkt á að ráða. Kærleikur, ás og ljósmóðir eru vegvísar á góð gildi en langt frá því að vera þjál eða falleg orð.  Ég held mig fast við HA.

[Anna Ringsted 26.7.2007 kl. 15:35]

Dalalæða, bara orðið eitt og sér fyllir mann friði og ró.  Sakna þess að sjá ekki orðið  heimsljós.  

[Anna Ólafsdóttir (anno) 26.7.2007 kl. 16:23]

Ég hélt að ég myndi missa af úrslitunum, sé að allt er í fullum gangi enn.

Sé samt að mín orð eru ekki alveg að gera sig, en ég er nú líka dáltið speeees  og átti ekki von á að hitta að vinningsorðið. Held mig samt við hrynjandi, gleði og dögg í þrjú fyrstu

[Kolgrima, 27.7.2007 kl. 21:22]

Hva, hittirðu Kela? Ég styð Eddu