19. júní - bleikir skór og mamma

19. júní er runninn upp. Það verður ekki vandamál að finna bleik föt að fara í, nema hvað buxurnar verða varla bleikar í þetta sinn, á einar, en þær eru ,,íþrótta-" og ekki innan klæðakóða vinnunnar minnar. Hins vegar er ég búin að taka til bleiku tölvutöskuna mína, sem ég nota bara spari (bleikt er viðkvæmt fyrir óhreinindum og töskuþrif erfiðari en fataþrif). Og svo er gaman að velja sér bleika skó til að fara í. Svolíitð svag fyrir bleikum skóm, þeir sem eru uppi í skóhillu eru aðeins sýnishorn, einhvern tíma þyrfti ég að safna þeim öllum saman og taka aðra mynd. Mér skilst að ég sé til dæmis ein af fáum sem eiga bleika Timberland útivistarskó - sé ekki þversögnina sem sumir þykjast sjá í því.

En 19. júní er samt aðallega dagurinn hennar mömmu. Hún á nefnilega afmæli á kvenréttindadaginn og vel við hæfi. Ein af stofnendum Rauðsokkahreyfingarinnar og ávallt og ævinlega mikil kvenfrelsiskona. Seinustu árin höfum við skroppið út að borða á afmælisdaginn hennar og ætlum að halda þeim sið þennan afmælisdag sem aðra. Þótt hún sé ekki sama bleika týpan og ég, þá skartar hún alltaf góðum, bleikum klæðum á þessum degi, frá því Feministafélagið fann upp á þessum frábæra sið, að mála bæinn bleikan 19. júní. Mamma sómdi sér hins vegar mjög vel í rússkinnsjakkanum sínum á víkingahátíðinni í fyrradag, þar sem jarðlitirnir áttu frekar við en 19. júní bleiki liturinn.

Athugasemdir

[Jenný Anna Baldursdóttir, 19.6.2007 kl. 09:58]

Til hamingju með daginn og mömmuna.  Flottir skór kona. 

[Helga 19.6.2007 kl. 10:06]

Til hamingju með daginn, allar stelpur og konur. Hamingjuóskir til hennar mömmu þinnar. Helga (sem fann engin bleik föt en skartar bleiku naglalakki í dag).

[Ester Sveinbjarnardóttir, 19.6.2007 kl. 13:49]

Kæra Anna til hamingju með daginn, amma mín átti afmæli þennan dag!

[Guðríður Haraldsdóttir, 19.6.2007 kl. 14:50]

Þú átt svo flotta skó ... Innilega til hamingju með mömmu þína. Ég bið kærlega að heilsa henni. 

[Anna Ólafsdóttir Björnsson, 19.6.2007 kl. 17:34]

Takk allar, verður ábyggilega gaman í kvöld. Valdi kúrekastígvélinu, í miðri efri röðinni. Skila kveðjum til mömmu og til hamingju með ömmu þína Ester, hún hefur vonandi lifað einhverjar jákvæðar breytingar á stöðu kvenna, með þennan afmælisdag.